ایجنسیاں
بارہمولہ؍۲۸ جولائی
بارہمولہ پولیس نے منگل کو بتایا کہ ایک نوجوان خاتون کے ساتھ مبینہ اجتماعی عصمت دری کرنے اور واردات کی ویڈیو بنانے کے الزام میں دو افراد کو گرفتار کر لیا گیا ہے۔ پولیس نے کہا کہ مسلسل تحقیقات، تکنیکی شواہد اور انسانی ذرائع سے حاصل ہونے والی معلومات کی بنیاد پر ملزمان تک رسائی حاصل کی گئی۔
ایک پریس کانفرنس سے خطاب کرتے ہوئے سینئر سپرنٹنڈنٹ آف پولیس (ایس ایس پی) بارہمولہ، گورندر پال سنگھ نے بتایا کہ متاثرہ خاتون نے۲۵ جولائی کو پولیس اسٹیشن بارہمولہ سے رجوع کرکے شکایت درج کرائی کہ وہ اپنے ایک مرد دوست کے ساتھ سیر و تفریح کے لیے جلشیری ڈرنگ بل گئی تھی، جہاں دو افراد نے انہیں روک لیا۔
ایس ایس پی کے مطابق ملزمان نے مبینہ طور پر دونوں کو ہراساں کیا، ان پر حملہ کیا اور خاتون کو اجتماعی عصمت دری کا نشانہ بنایا۔ انہوں نے بتایا کہ ملزمان نے مبینہ طور پر اس واردات کی ویڈیو بھی بنائی اور بعد میں یہ ویڈیو دیگر افراد کو دکھائی۔
انہوں نے کہا کہ ابتدائی مرحلے میں تحقیقات اس لیے مشکل ثابت ہوئیں کیونکہ متاثرہ خاتون ملزمان کو صرف ان کے پہلے ناموں سے جانتی تھی۔ تاہم تکنیکی شواہد اور انسانی ذرائع سے حاصل ہونے والی معلومات کی بنیاد پر پولیس نے ملزمان کی شناخت کی اور پیر کے روز انہیں گرفتار کر لیا۔
گرفتار شدگان کی شناخت شاکر احمد لون اور محمد اشرف، ساکنان جلشیری، کے طور پر کی گئی ہے۔ پولیس کے مطابق دونوں پیشے کے اعتبار سے ڈرائیور ہیں، جبکہ۲۷ سالہ محمد اشرف شادی شدہ ہے۔
ایس ایس پی نے بتایا کہ دونوں ملزمان پولیس کی تحویل میں ہیں اور مقدمے کی تحقیقات قانون کے مطابق منصفانہ، غیر جانبدارانہ اور مقررہ مدت کے اندر مکمل کی جا رہی ہیں۔
