فرانس، سلوواکیہ کے دوروں سے یورپ اور جی-7 گروپ کے ساتھ ہندوستان کے تعلقات مزید مضبوط ہوں گے: مودی

نئی دہلی، 13 جون (یو این آئی) وزیر اعظم نریندر مودی نے یقین ظاہر کیا ہے کہ فرانس اور سلوواکیہ کے ان کے دوروں سے یورپ اور جی-7 کے ساتھ ہندوستان کے تعلقات مزید مضبوط ہوں گے۔
مسٹر مودی نے فرانس اور سلوواکیہ کے چھ روزہ دورے پر روانہ ہونے سے پہلے ہفتہ کو ایک بیان میں کہا کہ ان کے یہ دورے یورپی براعظم اور اس سے آگے بھی ہندوستان کی شراکت داری کا دائرہ بڑھانے کے پختہ عزم کو بھی ظاہر کرتے ہیں۔ مسٹر مودی نے کہا، "فرانس کے صدر ایمانوئل میکرون اور سلوواکیہ کے وزیر اعظم رابرٹ فیکو کی دعوت پر میں 13-18 جون تک فرانس اورجمہوریہ سلوواکیہ کا دورہ کروں گا۔”
انہوں نے کہا، "ہندوستان کے اسٹریٹجک نقطہ نظر میں فرانس کا ایک خاص مقام ہے۔ اس سال کے آغاز میں صدر میکرون نے ہندوستان کا دورہ کیا تھا، تب ہم نے اپنے تعلقات کو ‘خصوصی عالمی اسٹریٹجک شراکت داری’ کی سطح تک بڑھایا تھا۔ جب میں نیس میں صدر میکرون سے ملوں گا، تو ہم فروری کے بعد ہوئی پیش رفت کا جائزہ لیں گے اور اپنے تعاون کے اگلے اقدامات پر تبادلہ خیال کریں گے۔ میں باہمی مفاد کے اہم عالمی امور پر بھی گفتگو کرنے کا منتظر ہوں۔”
مسٹر مودی نے کہا کہ وہ فرانسیسی شہر نیس میں 14 جون کو صدر میکرون کے ساتھ ‘انڈیا انوویٹس’ نمائش کا افتتاح کریں گے۔ ‘ہندوستان-فرانس اختراعی سال’ کے تحت منعقد ہونے والا یہ اہم پروگرام ہندوستان کے سب سے زیادہ ہونہار اسٹارٹ اپس کو عالمی سرمایہ کاری سے جوڑے گا اور ہندوستان کے اعلیٰ تعلیمی ایکو سسٹم سے نکلنے والی اختراعات کے لیے ایک بڑے محرک کے طور پر کام کرے گا۔
انہوں نے کہا کہ اس کے بعد وہ 14-15 جون کو سرکاری دورے پر سلوواکیہ جائیں گے۔ سال 1993 میں سلوواکیہ کی آزادی کے بعد سے کسی ہندوستانی وزیر اعظم کا یہ پہلا دورہ ہوگا۔ یہ تاریخی دورہ دوطرفہ تعلقات میں بنی مضبوط رفتار کو مزید آگے بڑھائے گا۔انہوں نے کہا، "میں براتیسلاوا میں صدر پیلیگرینی اور وزیر اعظم فیکو کے ساتھ بات چیت کرنے کا منتظر ہوں۔ مجھے سلوواکیہ کے معروف تاجروں کے ساتھ بات چیت کرنے کا موقع بھی ملے گا۔”
مسٹر مودی نے کہا کہ ہندوستان-یورپی یونین آزاد تجارتی معاہدے سے تعلقات میں آئی رفتار کو آگے بڑھاتے ہوئے، یہ دورہ یورپی یونین کے ساتھ اسٹریٹجک شراکت داری کو مزید مضبوط کرے گا۔ انہوں نے کہا کہ وہ سلوواکیہ سے واپس فرانس کے شہر ایوین لوٹیں گے اور 16-17 جون کو جی-7 سربراہی اجلاس میں شرکت کریں گے۔انہوں نے کہا، "جی-7 میں ہندوستان کی موجودگی ہمارے شراکت داروں کے ہم پر بھروسے اور ہماری بڑھتی ہوئی عالمی شناخت کو ظاہر کرتی ہے۔ یہ لگاتار آٹھواں جی-7 سربراہی اجلاس ہے، جس میں ہندوستان کو مدعو کیا گیا ہے۔ جی-7 میں ہندوستان نہ صرف اپنی بات رکھے گا، بلکہ ‘گلوبل ساؤتھ’ کی امنگوں کو بھی آواز دے گا۔ میں 18 جون کو پیرس میں اپنے دورہ فرانس کا اختتام کروں گا، جہاں میں صدر میکرون کے ساتھ ویوا ٹیک 2026 میں شرکت کروں گا۔” ویوا ٹیک ٹیکنالوجی اور اختراع کے شعبے میں یورپ کا سب سے بڑا ایونٹ ہے۔ اس بار اس میں ہندوستان کا سب سے بڑا قومی پویلین ہوگا، جو ہندوستانی اور یورپی اختراعی ایکو سسٹم کے درمیان شراکت داری کے وسیع امکانات کی ایک بہترین علامت ہے۔
مسٹر مودی نے کہا، "میں پیرس میں ہندوستانی برادری کے ارکان سے ملنے کے لیے بھی پرجوش ہوں، جو ہمارے دونوں ممالک کے درمیان ایک متحرک پل رہے ہیں۔”مسٹر مودی نے کہا کہ انہیں پورا بھروسہ ہے کہ فرانس اور جمہوریہ سلوواکیہ کے ان کے دورے یورپ اور جی-7 کے ساتھ ہندوستان کے بڑھتے ہوئے روابط کو مزید مضبوط کریں گے۔ ساتھ ہی، یہ دورے اس براعظم اور اس سے آگے بھی اپنی شراکت داری کا دائرہ بڑھانے کے تئیں ہمارے پختہ عزم کا مظاہرہ کریں گے۔