سپریم کورٹ نے راجیہ سبھا نامزدگی مسترد ہونے کے خلاف میناکشی نٹراجن کی عرضی کی مسترد، انتخابی عرضی دائر کرنے کی دی چھوٹ

نئی دہلی، 12 جون (یو این آئی) سپریم کورٹ نے جمعہ کو کانگریس رہنما محترمہ میناکشی نٹراجن کی اس عرضی کو مسترد کر دیا، جس میں انہوں نے مدھیہ پردیش سے راجیہ سبھا الیکشن کے لیے اپنی نامزدگی منسوخ کیے جانے کو چیلنج کیا تھا۔
تاہم، عدالت نے انہیں یہ چھوٹ دی ہے کہ وہ عوامی نمائندگی ایکٹ (پیپلز ریپریزنٹیشن ایکٹ) کے تحت انتخابی عرضی (الیکشن پٹیشن) دائر کر کے اس معاملے کو آگے بڑھا سکتی ہیں۔ جسٹس پرشانت کمار مشرا اور جسٹس اے ایس چاندورکر کی بنچ نے اس عرضی پر غور کرنے سے انکار کر دیا۔ بنچ نے فیصلہ دیا کہ آئین کے آرٹیکل 329 کے تحت اس مرحلے پر عدالتی مداخلت ممنوع ہے۔ یہ تبصرہ کرتے ہوئے کہ اس چیلنج کو قانونی انتخابی عرضی کے طریقہ کار کے ذریعے اٹھایا جا سکتا ہے، بنچ نے رٹ پٹیشن کو قابل سماعت نہ مانتے ہوئے مسترد کر دیا۔
محترمہ نٹراجن کی نامزدگی نو جون کو اس بنیاد پر مسترد کر دی گئی تھی کہ انہوں نے اپنے حلف نامے میں اس بات کا انکشاف نہیں کیا تھا کہ تلنگانہ کی ایک عدالت میں ان کے خلاف ایک نجی شکایت درج کرائی گئی تھی۔ محترمہ نٹراجن کی طرف سے پیش ہونے والے سینئر ایڈوکیٹ ابھیشیک منو سنگھوی نے کہا کہ الیکشن کمیشن نے کل ہی نتائج کا اعلان کر دیا، جس میں دیگر امیدواروں کو بلا مقابلہ فاتح قرار دے دیا گیا۔ اس کی وجہ سے کل مینشننگ کے وقت ان کی طرف سے ظاہر کیا گیا خدشہ سچ ثابت ہوا۔ حریف امیدوار کی جانب سے سینئر ایڈوکیٹ مکل روہتگی پیش ہوئے۔