ایجنسیز
سرینگر؍۱۲جون
ضلع بڈگام کے نیگو برینوار گاؤں میں جمعہ کے روز ایک اسکول بس سڑک سے پھسل کر گہری کھائی میں جا گری، جس کے نتیجے میں بس ڈرائیور جاں بحق جبکہ دو طالبات زخمی ہو گئیں۔
سرکاری ذرائع کے مطابق حادثہ اس وقت پیش آیا جب ڈرائیور مبینہ طور پر گاڑی پر قابو کھو بیٹھا، جس کے باعث بس سڑک سے نیچے کھائی میں جا گری۔
حادثے میں ڈرائیور شدید زخمی ہوا اور موقع پر ہی دم توڑ گیا، جبکہ بس میں سوار دو طالبات زخمی ہو گئیں۔ دونوں زخمی طالبات کو فوری طور پر بچا کر نزدیکی اسپتال منتقل کیا گیا جہاں ان کا علاج جاری ہے۔
حادثے کی اطلاع ملتے ہی ریسکیو ٹیمیں اور مقامی انتظامیہ موقع پر پہنچ گئیں اور امدادی کارروائیاں شروع کیں۔ بعد ازاں تباہ شدہ بس کو کھائی سے باہر نکال لیا گیا۔
حکام کے مطابق زخمی طالبات کی حالت مستحکم بتائی جا رہی ہے۔ پولیس نے واقعے کا نوٹس لیتے ہوئے حادثے کی اصل وجوہات جاننے کے لیے تحقیقات شروع کر دی ہیں۔
