گزشتہ چند برسوں کے دوران جموں و کشمیر میں ہاکی کے شعبے میں نمایاں تبدیلی دیکھنے میں آئی ہے:ایل جی سنہا
ویب ڈیسک
سرینگر؍۱۱ جون
جموں کشمیر کے لیفٹیننٹ گورنر منوج سنہا نے جمعرات کو کہا کہ کھیلوں کے بنیادی ڈھانچے، نچلی سطح کے مقابلوں اور عوامی شمولیت میں کی گئی سرمایہ کاری سے جموں و کشمیر میں ہاکی کی مقبولیت میں نمایاں اضافہ ہوا ہے اور امید ظاہر کی کہ یہ خطہ عالمی معیار کے ہاکی کھلاڑیوں کی نرسری بن کر ابھرے گا۔
لیفٹیننٹ گورنر نے یہ باتیں یہاں پولو گراؤنڈ میں واقع مصنوعی ہاکی آسٹرو ٹرف پر منعقدہ الفا ہاکی بین المدارس ٹورنامنٹ۲۰۲۶کی اختتامی تقریب سے خطاب کرتے ہوئے کہیں۔
اس ٹورنامنٹ میں کپواڑہ، بانڈی پورہ، کُلگام اور شوپیاں سمیت مختلف اضلاع کے۳۲؍اسکولوں کے طلبہ نے شرکت کی۔
اپنے خطاب میں منوج سنہا نے تمام فاتحین اور شرکاء کو ٹورنامنٹ کے دوران بہترین صلاحیتوں اور کھیل کے اعلیٰ معیار کے مظاہرے پر مبارکباد پیش کی۔
سنہا نے جموں و کشمیر اسپورٹس کونسل، بادل ہاکی کلب اور ہاکی جموں و کشمیر کی مشترکہ کاوشوں کو سراہتے ہوئے کہا کہ ان اداروں نے خطے کے نوجوان کھلاڑیوں کے جذبے اور صلاحیتوں کو اجاگر کرنے کے لیے ایک مؤثر پلیٹ فارم فراہم کیا ہے۔
ایل جی نے کہا’’اس ٹورنامنٹ کا مقصد صرف جیت اور ہار تک محدود نہیں تھا بلکہ اس نے ہمارے باصلاحیت بچوں کو اپنی حقیقی کھیلوں کی صلاحیتوں کو پہچاننے اور نکھارنے کا موقع فراہم کیا‘‘۔
سنہا نے کہا کہ گزشتہ چند برسوں کے دوران جموں و کشمیر میں ہاکی کے شعبے میں نمایاں تبدیلی دیکھنے میں آئی ہے۔
لیفٹیننٹ گورنر نے کہا’’کھیلوں کے بنیادی ڈھانچے، نچلی سطح کے مقابلوں اور کمیونٹی کی شمولیت میں سرمایہ کاری کے نتیجے میں پورے مرکز کے زیر انتظام علاقے میں ہاکی کی مقبولیت میں اضافہ ہوا ہے۔ ہماری خواہش ہے کہ آنے والے برسوں میں مزید اسکول اور نوجوان ہاکی سے وابستہ ہوں اور جموں و کشمیر عالمی معیار کی ہاکی صلاحیتوں کا مرکز بنے‘‘۔
سنہا نے کہا کہ حکومت جموں و کشمیر میں ایسے ٹیلنٹ پائپ لائن نظام کو فروغ دے رہی ہے جس کے ذریعے کھلاڑی اسکولی سطح سے علاقائی اور پھر قومی سطح تک پہنچ سکیں گے۔
ایل جی نے مزید کہا کہ سری نگر کے پولو ویو، پلوامہ اور پونچھ میں قائم مصنوعی ہاکی ٹرفس نے شہری علاقوں، سرحدی اضلاع اور دور دراز علاقوں کے نوجوان کھلاڑیوں کے لیے نئے مواقع پیدا کیے
