ایجنسیز
سرینگر؍۱۱ جون
سنٹرل ریزرو پولیس فورس (سی آر پی ایف) کے ڈائریکٹر جنرل جی پی سنگھ نے جمعرات کو اہلکاروں کو ہدایت دی کہ جنوبی کشمیر کے ہمالیائی علاقے میں ہونے والی امرناتھ یاترا کے محفوظ اور پُرامن انعقاد کو یقینی بنانے کے لیے پیشگی اور مؤثر اقدامات کیے جائیں۔
جی پی سنگھ، جو وادیٔ کشمیر کے تین روزہ دورے پر ہیں، نے یہاں سی آر پی ایف کے سینئر افسران اور زمینی سطح کے کمانڈروں کے ساتھ ایک اعلیٰ سطحی جائزہ اجلاس کی صدارت کی۔
سری نگر سیکٹر سی آر پی ایف نے سوشل میڈیا پلیٹ فارم ایکس پر ایک پوسٹ میں کہا’’وادیٔ کشمیر کے دورے کے تیسرے روز، سی آر پی ایف کے ڈائریکٹر جنرل جی پی سنگھ نے گروپ سینٹر سری نگر میں سینئر افسران اور زمینی کمانڈروں کے ساتھ ایک اعلیٰ سطحی سکیورٹی جائزہ اجلاس کی صدارت کی۔ انہوں نے شری امرناتھ جی یاترا۲۰۲۶ کے محفوظ اور پُرامن انعقاد کو یقینی بنانے کے لیے پیشگی اقدامات پر زور دیا‘‘۔
بیان کے مطابق اجلاس میں وادی میں معمول کے حالات برقرار رکھنے، سکیورٹی کارروائیوں میں تیزی لانے اور امرناتھ یاترا کے محفوظ انعقاد سے متعلق امور کا تفصیلی جائزہ لیا گیا۔
بدھ کے روز بھی سی آر پی ایف سربراہ نے یاترا کے لیے فورس کی آپریشنل تیاریوں کا جائزہ لیا تھا۔ اس موقع پر انہوں نے تمام متعلقہ اداروں کے درمیان مؤثر اور بلا رکاوٹ رابطہ کاری کی ضرورت پر زور دیا تاکہ یاتریوں کو محفوظ ماحول فراہم کیا جا سکے۔
انہوں نے ایک اجلاس کی صدارت بھی کی تھی جس میں سی آر پی ایف، سول انتظامیہ، جموں و کشمیر پولیس اور یاترا کی سکیورٹی سے وابستہ دیگر اداروں کے سینئر افسران نے شرکت کی تھی۔
۵۷ روز سالانہ امرناتھ یاترا؍۳ جولائی سے شروع ہوگی۔ یاترا دو راستوں سے جاری رہے گی:ضلع اننت ناگ میں واقع روایتی۴۸ کلومیٹر طویل ننون،پہلگام راستہ اور ضلع گاندربل میں واقع۱۴؍ کلومیٹر طویل مگر نسبتاً دشوار گزار بالتل راستہ۔ یاترا۲۸؍ اگست کو رکشا بندھن کے موقع پر اختتام پذیر ہوگی۔
