مودی کی قیادت میں ملک نے ترقی، گڈ گورننس اور خدمت کی نئی جہات قائم کیں : ریکھا گپتا

نئی دہلی، 10 جون (یو این آئی) دہلی کی وزیر اعلیٰ محترمہ ریکھا گپتا نے کہا ہے کہ وزیر اعظم نریندر مودی کی قیادت میں ملک نے گزشتہ 12 برسوں میں ترقی، گڈ گورننس، خدمت اور قومی وقار کی نئی جہات قائم کی ہیں۔
مسٹر مودی کی قیادت میں مرکزی حکومت کے 12 سال مکمل ہونے کے تاریخی موقع پر وزیر اعلیٰ نے بدھ کو یہاں کشن گنج میں واقع پنجراپول گؤشالا پہنچ کر خصوصی پوجا ارچنا کی۔ اس دوران وزیر اعلیٰ نے ملک کی ترقی، خوشحالی اور وزیر اعظم کی صحت مند و طویل عمر کے لیے دعا کی اور گؤ سیوا میں بھی حصہ لیا۔
اس موقع پر انہوں نے کہا کہ وزیر اعظم مودی کی قیادت میں ہندوستان نے گزشتہ 12 برسوں میں ترقی، گڈ گورننس، خدمت اور قومی وقار کی نئی جہات قائم کی ہیں۔ آج نہ صرف عوامی نمائندے، بلکہ ملک کے کروڑوں شہری وزیر اعظم کے تئیں تشکر کا اظہار کرتے ہوئے بھگوان سے ان کی اچھی صحت کے لیے دعا کر رہے ہیں۔ انہوں نے کہا کہ وزیر اعظم کی تقریباً ہر اسکیم کے مرکز میں خواتین کو بااختیار بنانے کا جذبہ نظر آتا ہے۔ کروڑوں بیت الخلا کی تعمیر سے خواتین کو وقار ملا، وہیں ’اجولا اسکیم‘ نے ماؤں اور بہنوں کی زندگیوں سے دھوئیں کی پریشانی کو دور کر کے ان کی زندگی کو مزید آسان بنا دیا ہے۔ ساتھ ہی ’مدرا اسکیم‘، ’پی ایم سواندھی‘ اور ’ڈرون دیدی‘ جیسی دور اندیش پہل کے ذریعے ملک کی لاکھوں خواتین اور نوجوان لڑکیوں کو انٹرپرینیورشپ اور خود روزگار کے نئے مواقع ملے ہیں۔
محترمہ گپتا نے کہا کہ ملک کی آدھی آبادی کی طرف سے وہ وزیر اعظم کا بہت بہت شکریہ ادا کرتی ہیں۔ انہوں نے یقین ظاہر کیا کہ مسٹر مودی کی ہنر مند قیادت میں ہندوستان ’ترقی یافتہ ملک‘ بننے کے اپنے ہدف کو جلد حاصل کر لے گا۔ انہوں نے دہرایا کہ وزیر اعظم کے ’سب کا ساتھ، سب کا وکاس، سب کا وشواس اور سب کا پریاس‘ کے بنیادی منتر سے ترغیب لے کر دہلی حکومت بھی ’ترقی یافتہ دہلی‘ کے عزم کو شرمندۂ تعبیر کرنے کے لیے عزم مصمم کے ساتھ مسلسل کام کر رہی ہے۔ وزیر اعلیٰ محترمہ گپتا نے وزیر اعظم کی لگن کو سب کے لیے باعث تحریک قرار دیتے ہوئے کہا کہ انہوں نے اپنی پوری زندگی ملک کی خدمت کے لیے وقف کر دی ہے۔ ملک کی خدمت کا طویل ترین دور کار مکمل کرنے کے دوران انہوں نے بغیر کسی چھٹی کے مسلسل قومی مفاد کو اولین ترجیح دی ہے۔ ان کے وژن کی وجہ سے ہی آج ہندوستان عالمی سطح پر ایک مضبوط، خود اعتماد اور فیصلہ کن ملک کے طور پر قائم ہوا ہے۔