نئی دہلی، 10 جون (یو این آئی) صدر جمہوریہ دروپدی مرمو نے وزیر اعظم نریندر مودی کے مسلسل سب سے طویل عرصے تک منتخب وزیر اعظم کے طور پر خدمات انجام دینے پر انہیں دلی مبارکباد دیتے ہوئے اس یقین کا اظہار کیا کہ خدمت، شمولیت اور قومی ترقی کے تئیں وزیر اعظم کا غیر متزلزل عزم ملک کو اس کی امنگوں کی تکمیل کی طرف لے جائے گا وزیر اعظم کے طور پر ملک کی خدمت میں وقف 4,399 دن مکمل ہونے پر صدر جمہوریہ نے مسٹر مودی کو ایک خط لکھ کر ان کی ستائش کی۔ انہوں نے اپنے پیغام میں کہا کہ عوامی زندگی میں ہندوستان کے وزیر اعظم جیسے عہدے کی ذمہ داری کے لیے بہت زیادہ لگن، لچک اور استقامت کی ضرورت ہوتی ہے۔ یہ کامیابی صرف اس عہدے پر طویل ترین مدت تک فائز رہنے کا معاملہ نہیں ہے، بلکہ یہ مسلسل انتخابات میں ان کی قیادت پر ہندوستان کے عوام کی جانب سے ظاہر کیے گئے اٹوٹ بھروسے کا ثبوت ہے۔ صدر جمہوریہ نے کہا، ”ہمارے جیسے وسیع، متنوع اور متحرک ملک میں، عوام کا اعتماد کسی بھی شہری کو دیا جانے والا سب سے بڑا اعزاز ہے۔ آپ کے تئیں یہ اعتماد گزشتہ برسوں میں بار بار دہرایا گیا ہے، جو ہماری جمہوریہ کے جمہوری سفر کے ایک شاندار باب کی عکاسی کرتا ہے“۔
محترمہ مرمو نے خط میں گزشتہ 12 برسوں کے دوران ملک میں ہونے والی اہم تبدیلیوں کا ذکر کیا۔ انہوں نے کہا کہ مالیاتی شمولیت کی کوششوں سے کروڑوں لوگ معاشی نظام سے جڑے ہیں، جن میں خواتین مستفیدین کی بڑی تعداد ہونا بے حد خوش آئند ہے۔ آج ملک کی ناری شکتی ترقیاتی سفر میں برابر کی شراکت داری نبھانے کے ساتھ ساتھ اس کی قیادت بھی کر رہی ہے۔ انہوں نے حکمرانی کو شفاف، موثر اور جوابدہ بنانے کے لیے ٹیکنالوجی کے استعمال کی بھی تعریف کی، جس سے عوامی بہبود کی اسکیموں کا فائدہ آخری شخص تک زیادہ تیزی سے پہنچ رہا ہے۔
صدر جمہوریہ نے خاص طور پر ’پی ایم-جن من‘ اسکیم کی تعریف کرتے ہوئے کہا کہ قطار کے آخری شخص کی فلاح یعنی ’انتودیہ کے نصب العین‘ اور کمزور قبائلی گروہوں کے تئیں وزیر اعظم کی ہمدردی نے انہیں گہرائی سے متاثر کیا ہے۔ اس کے ساتھ ہی انہوں نے ملک کے مشرقی اور شمال مشرقی حصوں جیسے پسماندہ علاقوں کی ترقی پر خصوصی توجہ دیے جانے کو طرزِ حکمرانی کے جذبے کی علامت قرار دیا۔
صدر جمہوریہ نے کہا، ”ایک سادہ خاندان سے آکر ملک کے سب سے طویل عرصے تک منتخب وزیر اعظم بننے کا آپ کا سفر ہندوستانی جمہوریت کی خوبصورت ترین مثال ہے۔ آج ہمارے باصلاحیت نوجوانوں کی توانائی اور خود کفیل و ترقی یافتہ ہندوستان کے عزم کے ساتھ ’قوم مقدم ‘ کے جذبے پر ملک آگے بڑھ رہا ہے، جس سے دنیا میں ہندوستان کا وقار اور افتخار بلند ہوا ہے“۔ انہوں نے اعتماد ظاہر کیا کہ ملک کی خدمت، سب کو ساتھ لے کر چلنے اور قومی ترقی کے تئیں وزیر اعظم کی یہی اٹوٹ وفاداری ہندوستان کے خوابوں کو شرمندۂ تعبیر کرے گی۔
