عوام کو پریشان ہونے کی ضرورت نہیں‘ کوئی بھی بھارت کی طرف آنکھ اٹھا کر دیکھنے کی جرات نہیں کر سکتا:سیٹھ
سرینگر؍۱۰ جون
پاکستان کے زیرِ قبضہ کشمیر (پی او کے) میں جاری بے چینی اور احتجاجی واقعات کے درمیان مرکزی وزیر مملکت برائے دفاع سنجے سیٹھ نے بدھ کے روز کہا کہ جموں و کشمیر میں لوگ امن و سکون کے ساتھ زندگی گزار رہے ہیں اور خطہ ترقی کر رہا ہے، جبکہ سرحد پار لوگ ہلاک ہو رہے ہیں۔
سری نگر میں صحافیوں سے گفتگو کرتے ہوئے سنجے سیٹھ نے کہا کہ ملک کے شہریوں کو اپنی سلامتی کے حوالے سے فکر مند ہونے کی ضرورت نہیں کیونکہ وزیر اعظم نریندر مودی اور وزیر دفاع راجناتھ سنگھ کی قیادت میں بھارت محفوظ ہاتھوں میں ہے۔
سیٹھ نے کہا’’ملک کے عوام کو پریشان ہونے کی ضرورت نہیں۔ کوئی بھی بھارت کی طرف آنکھ اٹھا کر دیکھنے کی جرات نہیں کر سکتا‘‘۔
وزیر مملکت برائے دفاع حضرت بل درگاہ کے دورے پر آئے تھے، جہاں انہوں نے وزیر اعظم مودی کے اقتدار کے۱۲ سال مکمل ہونے کے موقع پر۱۲ سال بے مثال‘ مہم کے تحت صفائی مہم کا افتتاح کیا۔
سیٹھ نے جموں و کشمیر میں امن و امان کی صورتحال کا ذکر کرتے ہوئے کہا کہ’’دیکھیں یہاں کتنا امن ہے۔ یکم جنوری۲۰۲۵ سے۳۱دسمبر۲۰۲۵تک، پہلگام دہشت گرد حملے کے باوجود‘۱ء۷۷کروڑ سیاح جموں و کشمیر آئے۔ میرا اندازہ ہے کہ۲۰۲۶میں سیاحوں کی تعداد تین کروڑ تک پہنچ جائے گی‘‘۔
وفاع کے وزیر مملکت نے کہا کہ ملک بھر کے لوگ کشمیر آنے کے لیے پُرجوش ہیں اور اسی لیے وزیر اعظم مودی نے عوام کو بیرونِ ملک سفر کے بجائے کشمیر اور شمال مشرقی ریاستوں کی سیر کرنے کی ترغیب دی ہے۔
مشرقِ وسطیٰ کی صورتحال کا حوالہ دیتے ہوئے سنجے سیٹھ نے کہا کہ خطے میں جنگ جیسی صورتحال کے باوجود بھارت میں مہنگائی قابو میں ہے اور ضروری اشیا کی فراہمی متاثر نہیں ہوئی۔
سیٹھ نے کہا’’ہمارے پاس تیل کے کنویں نہیں ہیں، پھر بھی ایندھن کی قیمتوں میں غیر معمولی اضافہ نہیں ہوا۔ معمولی اضافہ ضرور ہوا ہے، لیکن ملک میں نہ کوئی خوف ہے اور نہ ہی افراتفری‘‘۔
وزیر مملکت نے وزیر اعظم مودی کے۱۲سالہ دورِ اقتدار کو ملک کے لیے اہم قرار دیتے ہوئے کہا کہ مودی نے نہ صرف بھارت بلکہ کشمیر کی تقدیر اور شناخت بھی بدل دی ہے۔
انہوں نے کہا کہ صبح سب سے پہلے انہوں نے شنکراچاریہ مندر میں حاضری دی، صفائی مہم میں حصہ لیا اور بعد ازاں حضرت بل درگاہ میں وزیر اعظم کی صحت، درازیٔ عمر اور ملک کی خوشحالی کے لیے دعا کی۔
سیٹھ نے کہا کہ آج پورا ملک وزیر اعظم مودی کی اچھی صحت اور طویل عمر کے لیے دعاگو ہے اور بھارت تیزی سے ترقی اور خوشحالی کی جانب گامزن ہے۔
