ایجنسیز
کٹھوعہ؍۸مئی
سینئر سپرنٹنڈنٹ آف پولیس (ایس ایس پی) کٹھوعہ‘موہت شرما نے جمعرات کو کہا کہ نکُل سنگھ کو مبینہ طور پر اُس کے دوست پرتھو ورما(۱۹) نے ایک محبت سے متعلق معاملے پر ہونے والے جھگڑے کے بعد قتل کیا۔
میڈیا سے بات کرتے ہوئے ایس ایس پی شرما نے کہا کہ جھگڑے کے دوران ملزم نے مبینہ طور پر کرکٹ بیٹ سے نُکل کے سر پر بار بار حملہ کیا، یہاں تک کہ وہ گر پڑا۔
افسر نے مزید بتایا کہ جب نکُل کا چھوٹا بھائی گھر میں داخل ہوا تو ملزم نے مبینہ طور پر اس پر بھی بیٹ سے حملہ کیا، کیونکہ اُسے خدشہ تھا کہ وہ اسے پہچان لے گا۔ حملے کے دوران چھوٹا بھائی بھی گر پڑا، تاہم وہ زندہ بچ گیا۔
پولیس کے مطابق جرم انجام دینے کے بعد ملزم مبینہ طور پر نکُل سنگھ کا موبائل فون لے کر موقع سے فرار ہوگیا۔
ایس ایس پی شرما نے کہا کہ بعد میں پولیس نے کال ڈیٹیل ریکارڈ (سی ڈی آر) کے ذریعے ملزم کا سراغ لگایا اور اُسے ضلع کے اندر سے گرفتار کر لیا۔ انہوں نے مزید کہا کہ نکُل اور ملزم دونوں دوست تھے اور معاملے کی مزید تحقیقات جاری ہے۔
