امن و خوشحالی کی دعا/’ یہ دن خوشیاں بانٹنے کی ترغیب دیتا ہے‘
ایجنسیز
جموں/سری نگر؍۲۰مارچ
لیفٹیننٹ گورنر منوج سنہا اور وزیر اعلیٰ عمر عبداللہ نے عیدالفطر اور نوروز کے پُرمسرت مواقع پر جموں و کشمیر کے عوام سمیت دنیا بھر کے مسلمانوں کو مبارکباد پیش کرتے ہوئے امن، ترقی اور خوشحالی کی دعا کی ہے۔
لیفٹیننٹ گورنر منوج سنہا نے اپنے پیغام میں کہا’’عیدالفطر کے اس بابرکت موقع پر میں سب کو دلی مبارکباد اور نیک تمنائیں پیش کرتا ہوں۔ یہ تہوار ماہِ رمضان کے اختتام کی علامت ہے اور گہری روحانی و سماجی اہمیت کا حامل ہے۔ یہ مقدس موقع قربانی کے جذبے اور خوشیاں بانٹنے کی ترغیب دیتا ہے۔ آئیے اس دن ہم انسانیت کی خدمت کا عہد کریں اور غریب و مستحق افراد کی زندگیوں کو بہتر بنانے کے لیے کام کریں۔ اللہ کرے یہ عید سب کے لیے امن، خوشحالی اور مسرت لے کر آئے‘‘۔
دریں اثنا وزیر اعلیٰ عمر عبداللہ نے بھی عیدالفطر اور نوروز کے موقع پر عوام کو مبارکباد دیتے ہوئے کہا کہ عید ایک روحانی جشن ہے جو رمضان کے روزوں، عبادات اور خود احتسابی کے بعد منایا جاتا ہے۔
عمرعبداللہ نے کہا کہ یہ تہوار اللہ تعالیٰ کا شکر ادا کرنے اور ہمدردی، سخاوت اور اتحاد جیسی اقدار کو فروغ دینے کا موقع فراہم کرتا ہے۔
وزیر اعلیٰ کاکہنا تھا’’ عید ایک خوشیوں بھرا موقع ہے جو لوگوں کو قریب لاتا ہے، باہمی احترام اور بھائی چارے کو مضبوط کرتا ہے اور ہمیں ضرورت مندوں کی مدد کرنے کی ترغیب دیتا ہے‘‘۔
عمرعبداللہ نے مزید کہا کہ یہ تہوار جموں و کشمیر کی مشترکہ ثقافت، ہم آہنگی اور تنوع کی عکاسی کرتا ہے اور اتحاد و امن کے جذبے کو فروغ دیتا ہے۔
نوروز کے حوالے سے انہوں نے کہا کہ یہ تہوار بہار کی آمد اور فارسی نئے سال کی شروعات کی علامت ہے، جو امید، ہم آہنگی اور نئی شروعات کا پیغام دیتا ہے۔ انہوں نے دعا کی کہ دنیا میں امن قائم ہو اور یہ تہوار ہر گھر میں خوشی اور مثبتیت لے کر آئے۔
عمرعبداللہ نے جموں و کشمیر کے عوام کے لیے دیرپا امن، ترقی اور خوشحالی کی بھی دعا کی۔
