ایجنسیز
سرینگر؍۱۳مارچ
جموں و کشمیر کے وزیر اعلیٰ عمر عبداللہ کی قیادت میں کابینہ نے منگل کو نیشنل کانفرنس کے صدر فاروق عبداللہ پر ہوئے حملے کی متفقہ طور پر مذمت کرتے ہوئے اس واقعے کی گہرائی سے تحقیقات کا مطالبہ کیا ہے۔
سرکاری ترجمان کے مطابق کابینہ نے مسافر بردار گاڑیوں کے کرایوں میں۱۸فیصد اضافے کی منظوری بھی دی ہے۔ یہ مطالبہ ٹرانسپورٹر گزشتہ پانچ برسوں سے کر رہے تھے۔ ٹرانسپورٹروں نے۵۰فیصد اضافے کا مطالبہ کیا تھا، تاہم حکومت نے۱۸فیصد اضافہ منظور کیا۔
ترجمان نے بتایا کہ حکومت نے مزید۲۰۰ بسیں سڑکوں پر چلانے کا بھی فیصلہ کیا ہے۔
کابینہ نے وزراء، ارکان اسمبلی، اسپیکر اور قائدِ حزب اختلاف کے ٹی اے، ڈی اے اور طبی الاؤنس میں اضافے کی بھی منظوری دی ہے۔
ایل پی جی کی جاری صورتحال کے بارے میں ترجمان نے کہا کہ جموں و کشمیر میں گیس کا وافر ذخیرہ موجود ہے اور لوگوں سے اپیل کی گئی ہے کہ وہ گھبراہٹ کا مظاہرہ نہ کریں۔
انہوں نے عوام سے انتظامیہ کے ساتھ تعاون کی اپیل کرتے ہوئے کہا کہ ممکنہ بلیک مارکیٹنگ کو روکنے کے لیے خصوصی ٹیمیں تشکیل دی گئی ہیں۔
