کے پاس معاشرے اور قوم کو مستقبل کی جانب لے جانے کی بے پناہ قوت موجود ہے:لیفٹیننٹ گورنر سنہا
طلبہ اختراع کو اپنائیں، نئی تحقیق کی جستجو کریں، بے خوف تجربات کریں اور قوم کی تعمیر کے دروازے کھولیں
جموں؍۲۷فروری
لیفٹیننٹ گورنر منوج سنہا نے کہا ہے کہ نوجوانوں کے پاس معاشرے اور قوم کو مستقبل کی جانب لے جانے کی بے پناہ قوت موجود ہے۔ انہوں نے پائیدار ترقی کے لیے متوازن ذہنوں اور جرات مند اختراع کاروں کی تشکیل پر خصوصی توجہ دینے پر زور دیا۔
لیفٹیننٹ گورنر جموں یونیورسٹی میں منعقدہ منفرد یوتھ فیسٹیول ’گونج۲۰۲۶‘ کی افتتاحی تقریب سے خطاب کر رہے تھے۔ انہوں نے کہا’’بااختیار نوجوان ہی مستقبل کی تعمیر کرتے ہیں اور میرا یقین ہے کہ فکری گہرائی، تخلیقی قوت اور اختراعی نوجوان قیادت قومی ترقی کے لیے ناگزیر ہے‘‘۔
دو روزہ اس تقریب میں مختلف شعبہ جات سے تعلق رکھنے والے نوجوانوں کو ایک مشترکہ مستقبل کی تعمیر کے لیے منفرد پلیٹ فارم فراہم کیا جائے گا۔ فیسٹیول ذہن کو جلا بخشے گا، جسم کو متحرک کرے گا اور اختراع کی چنگاری کو روشن کرے گا۔
لیفٹیننٹ گورنر نے کہا کہ جب نوجوان اپنے اندر حوصلے کی شمع روشن کرتے ہیں اور غیر متزلزل یقین کے ساتھ آگے بڑھتے ہیں تو معاشرے اور قوم کے لیے نئی راہیں کھلتی ہیں۔ انہوں نے طلبہ کو تلقین کی کہ وہ اختراع کو اپنائیں، نئی تحقیق کی جستجو کریں، بے خوف تجربات کریں اور قوم کی تعمیر کے دروازے کھولیں۔
سنہا نے کہا’’اپنی روایات کا احترام کریں، اپنے ماضی کو قدر کی نگاہ سے دیکھیں اور اپنی جڑوں سے جڑے رہیں۔ اس سے شناخت، اعتماد اور خود آگاہی کا وہ گہرا احساس پیدا ہوگا جو کوئی بھی کلاس روم مکمل طور پر نہیں سکھا سکتا‘‘۔
لیفٹیننٹ گورنر نے کہا کہ تعلیم کا مقصد محض علم کا حصول نہیں بلکہ ایسے باخبر اور ذمہ دار شہریوں کی تخلیق ہے جو اپنے فرائض کے تئیں حساس ہوں۔ انہوں نے کہا، ’’حقیقی تعلیم نوجوانوں کو ایسے نئے جوابات اور حل وضع کرنے کے لیے تیار کرتی ہے جن کا دنیا نے ابھی تصور بھی نہیں کیا۔ طلبہ کیمپس میں صرف ڈگری حاصل کرنے کے لیے نہیں آتے بلکہ ثقافت کی آبیاری، نئے خیالات کی تلاش، جرات مندانہ راستوں کے انتخاب اور معاشرتی ترقی کو آگے بڑھانے کے لیے قدم رکھتے ہیں‘‘۔
ایل جی نے مزید کہا کہ دنیا جس رفتار سے تبدیل ہو رہی ہے وہ تقریباً ناقابلِ فہم ہے اور ٹیکنالوجی کے دھماکے نے خاموشی سے تعلیمی اداروں اور صنعتوں دونوں کو بدل دیا ہے۔ انہوں نے اساتذہ کو ہدایت دی کہ وہ اعلیٰ تعلیمی اداروں کو نئے خیالات کی تیاری کے مراکز میں تبدیل کریں۔
سنہا نے کہا’’کوشش نصاب تک محدود نہ رہے۔ مختلف شعبوں کے درمیان حقیقی مکالمہ ہونا چاہیے۔ ہر کلاس روم میں ہر لیکچر نئی امکانات کی جانب ایک دروازہ بن جائے‘‘۔
اس موقع پر لیفٹیننٹ گورنر نے جموں یونیورسٹی کے شعبہ صحافت و میڈیا اسٹڈیز کی ایک پہل، پوڈکاسٹ ’جے یو واچن‘ کا بھی اجرا کیا۔
تقریب میں وائس چانسلر جموں یونیورسٹی پروفیسر امیش رائے، ڈویژنل کمشنر جموں رمیش کمار، ڈین ریسرچ اسٹڈیز پروفیسر نیلو روہمیترہ، ڈین اسٹوڈنٹس ویلفیئر پروفیسر پرکاش انتھل، مختلف شعبہ جات کے سربراہان، اساتذہ، سینئر افسران اور بڑی تعداد میں طلبہ موجود تھے۔
پدم شری ڈاکٹر جتیندر ادھم پوری، پدم شری ڈاکٹر ایس پی ورما، پدم شری رومالو رام، سابق ڈی جی پی اشوک بھان اور مختلف شعبہ ہائے زندگی سے تعلق رکھنے والی ممتاز شخصیات نے بھی افتتاحی تقریب میں شرکت کی۔
