وراٹ کوہلی کی سنچری، دہلی نے آندھرا پردیش کو دھول چٹا دی

بنگلورو،24 دسمبر (یواین آئی )وجے ہزارے ٹرافی 2025 کے ایلیٹ گروپ ڈی مقابلے میں دہلی نے وراٹ کوہلی کی شاندار سنچری اور سمرجیت سنگھ کی تباہ کن بولنگ کی بدولت آندھرا پردیش کو 4 وکٹوں سے ہرا دیا۔ دہلی نے 299 رنز کا ہدف محض 37.4 اوورز میں حاصل کر کے ٹورنامنٹ کا فاتحانہ آغاز کیا۔
ہدف کے تعاقب میں دہلی کی شروعات مایوس کن رہی جب اوپنر ارپت رانا بغیر کھاتہ کھولے آؤٹ ہو گئے۔ تاہم، 15 سال بعد اس ٹورنامنٹ میں واپسی کرنے والے وراٹ کوہلی نے میدان سنبھال لیا۔
کوہلی نے 101 گیندوں پر 131 رنز کی دلکش اننگز کھیلی، جس میں 14 چوکے اور 3 چھکے شامل تھے۔ انہوں نے پرینش آریہ (74 رنز) کے ساتھ مل کر دوسری وکٹ کے لیے 113 رنز جوڑے۔نتیش رانا نے بھی جارحانہ مزاج اپناتے ہوئے 55 گیندوں پر 77 رنز بنائے۔ اگرچہ کپتان رشبھ پنت (5) اور آیوش بدونی (1) جلد آؤٹ ہو گئے، لیکن دہلی نے 74 گیندیں قبل ہی ہدف حاصل کر لیا۔اس سے قبل دہلی نے ٹاس جیت کر پہلے بولنگ کا فیصلہ کیا جو درست ثابت ہوا۔ آندھرا کے بلے باز رکی بھوئی نے شاندار بیٹنگ کرتے ہوئے 105 گیندوں پر 122 رنز بنائے (11 چوکے، 7 چھکے)۔ ان کی اس اننگز کی بدولت آندھرا نے مقررہ 50 اوورز میں 8 وکٹوں پر 298 رنز بنائے۔ شیخ رشید (31)، پرساد (28) اور ہیمنت ریڈی (27) نے کچھ مزاحمت دکھائی۔دہلی کی جیت میں بولرز کا کردار بھی کلیدی رہا انہوں نے بہترین لائن اور لینتھ کے ساتھ بولنگ کرتے ہوئے 5 وکٹیں حاصل کیں اور آندھرا کے مڈل آرڈر کو بکھیر دیا۔ انہوں نے بھی سمرجیت کا بھرپور ساتھ دیا اور 3 اہم وکٹیں اپنے نام کیں۔
ہندوستانی کرکٹ کے سپر اسٹار وراٹ کوہلی نے ایک بار پھر تاریخ رقم کر دی ہے۔ بدھ کے روز وجے ہزارے ٹرافی میں آندھرا پردیش کے خلاف میچ کے دوران کوہلی لسٹ-اے کرکٹ میں 16,000 رنز مکمل کرنے والے دوسرے ہندوستانی بلے باز بن گئے ہیں۔ اس سے قبل یہ اعزاز صرف لیجنڈری سچن ٹنڈولکر کو حاصل تھا۔
اس تاریخی کامیابی کے ساتھ وراٹ کوہلی دنیا کے نویں بلے باز بن گئے ہیں جنہوں نے لسٹ-اے کرکٹ میں 16 ہزار رنز کا ہندسہ عبور کیا ہے۔ وہ اب گراہم گوچ، سچن ٹنڈولکر، رکی پونٹنگ اور کمار سنگاکارا جیسے عظیم کھلاڑیوں کی صف میں شامل ہو گئے ہیں۔ قابل ذکر ہے کہ لسٹ-اے میں سب سے زیادہ رنز کا ریکارڈ انگلینڈ کے گراہم گوچ (22,211 رنز) کے پاس ہے۔وراٹ کوہلی تقریباً 15 سال کے طویل وقفے کے بعد ہندوستان کے اس اہم 50 اوورز کے ڈومیسٹک ٹورنامنٹ (وجے ہزارے ٹرافی) میں حصہ لے رہے ہیں۔ بی سی سی آئی کی نئی پالیسی کے تحت مرکزی کنٹریکٹ یافتہ کھلاڑیوں کے لیے گھریلو کرکٹ کھیلنا لازمی قرار دیا گیا ہے۔ اس بار کوہلی اپنی ریاست دہلی کی ٹیم کی نمائندگی رشبھ پنت کی کپتانی میں کر رہے ہیں۔