دبئی، 22 دسمبر (یو این آئی ) اسٹار آل راؤنڈر شکیب الحسن کی شاندار بالنگ اور ذمہ دارانہ بیٹنگ کی بدولت ایم آئی ایمریٹس نے دبئی انٹرنیشنل اسٹیڈیم میں کھیلے گئے میچ میں ڈیزرٹ وائپرز کو 4 وکٹوں سے شکست دے دی۔ اس فتح کے ساتھ ہی ایم آئی ایمریٹس نے پوائنٹس ٹیبل پر دوسری پوزیشن دوبارہ حاصل کر لی ہے۔
ٹیم کے مستقل کپتان کی عدم موجودگی میں سیم کرن کی قیادت میں اترنے والی ڈیزرٹ وائپرز کی ٹیم پہلے بیٹنگ کرتے ہوئے مقررہ اوورز میں صرف 124 رنز بنا سکی۔
شکیب الحسن نے محض 14 رنز دے کر 2 اہم وکٹیں حاصل کیں اور رنز کی رفتار کو بریک لگا دیا۔ ڈین لارنس 35 رنز کے ساتھ نمایاں رہے، جبکہ ڈیتھ اوورز میں ظہور خان نے 17 رنز کے عوض 2 کھلاڑیوں کو آؤٹ کر کے وائپرز کو بڑے اسکور سے روک دیا۔
125 رنز کے ہدف کے تعاقب میں ایم آئی ایمریٹس کا آغاز اچھا نہ تھا اور پاور پلے میں جونی بیرسٹو اور محمد وسیم کی وکٹیں گرنے سے ٹیم دباؤ کا شکار ہو گئی۔
ایک موقع پر میچ پھنستا ہوا دکھائی دے رہا تھا لیکن کپتان کیرون پولارڈ نے 15 گیندوں پر 26 رنز (بشمول دو چھکے) بنا کر میچ کا نقشہ پلٹ دیا۔پولارڈ کے آؤٹ ہونے کے بعد شکیب الحسن نے ایک اینڈ سنبھالے رکھا اور 17 رنز کی ناقابلِ شکست اننگز کھیل کر وننگ باؤنڈری لگائی۔ ایم آئی ایمریٹس نے ہدف 17.3 اوورز میں حاصل کر لیا۔میچ کے بہترین کھلاڑی شکیب الحسن نے کہا”یہ پچ اسپنرز کے لیے سازگار تھی اور میرا فوکس صحیح جگہ پر گیند بازی کرنے پر تھا۔ بیٹنگ مشکل تھی، اس لیے میں نے اینکر کا کردار ادا کیا تاکہ ٹیم ہدف تک پہنچ سکے۔ڈیزرٹ وائپرز کے قائم مقام کپتان سیم کرن نے شکست کے باوجود اپنے باؤلرز کی ہمت کی تعریف کی اور کہا کہ پلے آف کے لیے کوالیفائی کرنے کے بعد انہوں نے ٹیم میں تبدیلیاں کیں تاکہ کھلاڑیوں کے کام کے بوجھ کو سنبھالا جا سکے۔
