راہل گاندھی نے جرمنی کے سابق چانسلر اولف شولز سے ملاقات کی

نئی دہلی، 19 دسمبر (یو این آئی) لوک سبھا میں اپوزیشن لیڈر راہل گاندھی نے جمعہ کو جرمنی کے سابق چانسلر اولف شولز کے ساتھ ملاقات کی اور عالمی امور، تجارت اور بدلتی ہوئی دنیا میں ہند-جرمنی تعلقات کو مضبوط بنانے پر تفصیلی تبادلۂ خیال کیا۔
مسٹر راہل گاندھی نے برلن کے ‘ہرٹی اسکول’ میں طلبہ، دانشوروں اور ماہرینِ تعلیم سے خطاب کرتے ہوئے بدلتے ہوئے عالمی منظر نامے میں قیادت، جمہوریت اور عالمی ذمہ داری پر گفتگو کی۔ انہوں نے موجودہ سیاسی صورتحال کے ساتھ ساتھ ہندوستانی جمہوریت کی حالت پر بھی اپنے خیالات کا اظہار کیا۔ مسٹر راہل گاندھی نے جامع اور مساوی تعلیم کی اہمیت پر زور دیا اور مضبوط عالمی تعاون کی ضرورت کا ذکر کیا۔ انہوں نے اس موقع پر اپنے ذاتی اور سیاسی تجربات بھی شیئر کیے ۔
قابلِ ذکر ہے کہ مسٹرراہل گاندھی 15 سے 20 دسمبر تک جرمنی کے دورے پر ہیں اور وہ ہند نژاد افراد سے ملاقاتیں اور مختلف مسائل پر بات چیت کر رہے ہیں۔ مسٹر گاندھی جرمنی میں ‘انڈین اوورسیز کانگریس’ کے ایک پروگرام میں بھی شریک ہوئے ۔ اس دورے کے دوران انہوں نے بی ایم ڈبلیو کے ہیڈ کوارٹر کا دورہ کیا اور وہاں پلانٹ کے طریقۂ کار کے بارے میں معلومات حاصل کیں۔