کانگریس نے آلودگی پر بحث روکنے کے حکومت کے الزام کی تردید کی

نئی دہلی، 19 دسمبر (یو این آئی) کانگریس پارٹی نے پارلیمنٹ کے سرمائی اجلاس کو آلودگی کا سیشن قرار دیتے ہوئے کہا ہے کہ آلودگی پر بحث نہ ہونے دینے کا الزام جھوٹا ہے اور پارٹی اس الزام کو پوری طرح سے مسترد کرتی ہے ۔
کانگریس کے کمیونیکیشن ڈپارٹمنٹ کے سربراہ جے رام رمیش نے جمعہ کو یہاں پارٹی ہیڈکوارٹر میں ایک پریس کانفرنس میں کہا کہ پارلیمنٹ میں آلودگی کے مسئلہ پر بحث نہ کرانے کا اپوزیشن پر حکومت کا الزام بے بنیاد اور مکمل طور پر غلط ہے ۔ کانگریس ہی چاہتی تھی کہ اس مسئلہ پر پارلیمنٹ میں بحث ہونی چاہیے ، کیونکہ دہلی میں آلودگی نے زندگی کو مشکل بنا دیا ہے ۔ اس لیے حکومت کا الزام جھوٹا ہے اور پارٹی اس الزام کی تردید کرتی ہے ۔
انہوں نے کہا کہ کانگریس نے خود اس مسئلہ پر بحث کرنے کا خیال پیش کیا تھا اور یہ لوک سبھا میں قائد حزب اختلاف راہل گاندھی تھے جنہوں نے اس مسئلہ کو اٹھایا اور حکومت سے بحث کا مطالبہ کیا۔ اتنا ہی نہیںاس پر بحث کا نوٹس بھی کانگریس نے ہی دیا تھا تو حکومت کس بنیاد پر کہتی ہے کہ اپوزیشن کی وجہ سے بحث نہیں ہو سکی؟
کانگریس لیڈر نے کہا کہ انہیں امید تھی کہ حکومت اس پر بحث کرائے گی، لیکن اچانک لوک سبھا کو غیر معینہ مدت کے لیے ملتوی کر دیا جاتا ہے ۔ پارلیمنٹ کا سرمائی اجلاس ختم ہوگیا۔ حکومت نے ہی سیشن سے قبل ایک باضابطہ کل جماعتی میٹںگ بلائی جس میں یہ معاملہ بھی زیر بحث آیا کہ اپوزیشن ایوان میں کیا مسئلہ اٹھانا چاہتی ہے اور حکومت کون سے بل لانا چاہتی ہے ۔ اسی کے مطابق، حکومت کی جانب سے کہا گیا تھا کہ وہ 14 بل پیش کرے گی، جن میں سے 12 بڑے بل ہوں گے ۔
انہوں نے کہا کہ حیرت کی بات ہے کہ ایوان میں پانچ بلز پیش ہی نہیں کیے گئے اور اچانک ایوان کی کارروائی غیر معینہ مدت کے لیے ملتوی کردیا گئی۔