جموں کشمیر میں فصلوں کی بیمہ اسکیموں کے نفاذ کی منظوری

سرینگر //
چیف سیکریٹری‘ڈاکٹر ارون کمار مہتا نے آج پردھان منتری فصل بیمہ یوجنا ( پی ایم ایف بی وائی ) اور ری اسٹرکچرڈ ویدر بیسڈ کراپ انشورنس اسکیم ( آر ڈبلیو بی سی آئی ایس ) کے نفاذ کیلئے فصل بیمہ پر ریاستی سطح کی رابطہ کمیٹی ( ایس ایل سی سی سی آئی ) کی میٹنگ طلب کی ۔
چیف سیکریٹری نے ایس ایل سی سی سی آئی میٹنگ کی صدارت کرتے ہوئے جموں کشمیر یو ٹی میں فصلوں کی بیمہ اسکیموں یعنی پی ایم ایف بی وائی اور آر ڈبلو بی سی آئی ایس کے نفاذ کو منظوری دی ۔
کمیٹی نے جموں کشمیر میں ان اسکیموں کے کامیاب نفاذ کیلئے اپنائے جانے والے طریقہ کار کو بھی منظوری دی ۔
اس اسکیم میں دھان ، مکئی ، تیل کے بیج ، گندم ، سیب ، زعفران ، آم اور لیچی کی فصلیں شامل ہوں گی ۔
ڈاکٹر مہتا نے موسم کی مختلف خرابیوں کی وجہ سے فصلوں کے نقصان کے خلاف کسانوں کو بیمہ فراہم کرنے کی ضرورت پر زور دیا ۔