رینشا اور اوون سیریز کے پہلے میچ میں اپنا ون ڈے ڈیبیو کریں گے

پرتھ، 18 اکتوبر (یو این آئی) ٹیسٹ کرکٹ میں ڈیبیو کرنے کے ایک عرصہ بعد میتھیو رینشا اتوار کے روز آسٹریلیا کے لئے اپنا ون ڈے میچ کھیلیں گے ۔ اس بات کی تصدیق ہوگئی ہے کہ بائیں ہاتھ کے بلے باز ہندوستان کے خلاف سیریز کے پہلے میچ میں آل راونڈر مچ اووین کے ساتھ ڈیبیو کریں گے۔ جوش فلپ وکٹ کیپنگ کے فرائض انجام دیں گے، کیونکہ جوش اِنگلِس ابھی تک پنڈلی کی انجری سے مکمل طور پر صحت یاب نہیں ہو سکے ہیں۔ اسپن آل راؤنڈر کوپر کونوِلی کو بھی مڈل آرڈر میں شامل کیا گیا ہے۔
آسٹریلیا نے چار اسپیشلسٹ فاسٹ بولرز کے ساتھ کھیلنے کی روایت برقرار رکھی ہے۔ بائیں ہاتھ کے اسپنر میتھیو کوہنمن اپنا پانچواں ون ڈے کھیلیں گے، جبکہ ایڈم زمپا خاندانی وجوہات کی بنا پر اس میچ سے باہر ہیں۔
2018 میں پرتھ اسٹیڈیم میں ہونے والے پہلے میچ کے بعد سے یہاں کھیلے گئے تمام 50 اوورز کے بین الاقوامی میچز میں فاسٹ بولرز کا غلبہ رہا ہے۔ گزشتہ سال نومبر میں اسی میدان پر پاکستان کے فاسٹ بولرز نے آسٹریلیا کو محض 140 رنز پر آؤٹ کر دیا تھا۔
کپتان مچ مارش کا کہنا ہے کہ نئی گیند کو قابو میں رکھنا پہلے میچ کے نتیجے کے لیے فیصلہ کن عنصر ثابت ہو سکتا ہے۔
ٹریوس ہیڈ اور مارش کو آسٹریلیا کی نئی اوپننگ جوڑی کے طور پر منتخب کیا گیا ہے، جبکہ میٹ شارٹ جو اپنے پچھلے 10 ون ڈے میچز میں اوپننگ کر چکے ہیں، اب تیسرے نمبر پر بیٹنگ کریں گے۔
شارٹ پسلی کی انجری کے باعث جنوبی افریقہ کے خلاف سیریز سے باہر تھے اور کواڈ انجری کی وجہ سے چیمپئنز ٹرافی کے آخری میچ میں بھی حصہ نہیں لے سکے۔ وہ اس سال فروری کے بعد پہلی بار نیوزی لینڈ کے ٹی20 دورے میں ٹیم میں واپس آئے، جہاں انہوں نے تیسرے نمبر پر بیٹنگ کی اور 29، 2 اور 7 رنز بنائے۔
قومی سلیکٹر جارج بیلی نے کہا کہ وہ شارٹ اور دیگر کھلاڑیوں کے ساتھ آسٹریلیا کی وائٹ بال ٹیم میں لچک اور مختلف کردار نبھانے کی صلاحیت پر گفتگو کر چکے ہیں۔ بیلی کے مطابق: “یہ شارٹ کے لیے کچھ مایوس کن رہا ہے، کیونکہ ہم نے انہیں زیادہ کرکٹ کھیلنے کے مواقع دینے کا ارادہ کیا تھا، لیکن مختلف اوقات میں ان سے مختلف کردار کی توقع تھی۔”
نئے کھلاڑی مچ اووین اتوار کو مڈل آرڈر میں بیٹنگ کریں گے، حالانکہ پچھلے سیزن میں وہ تسمانیہ کے لیے اوپننگ میں شاندار کارکردگی دکھا چکے ہیں۔ انہوں نے فروری میں جنوبی آسٹریلیا کے خلاف صرف 48 گیندوں پر سنچری اسکور کی تھی۔
اووین نے جولائی میں جمائیکا میں ٹی20 ڈیبیو کیا تھا اور مڈل آرڈر میں متاثر کن کارکردگی دکھائی تھی۔ آسٹریلیا کو امید ہے کہ میکسویل کے ریٹائرمنٹ کے بعد وہ ون ڈے ٹیم میں بھی اسی طرح ساتویں نمبر پر کامیاب کردار ادا کریں گے۔
دوسری جانب میتھیو رینشا نے 2021–22 کے بعد سے کوئنزلینڈ کی ون ڈے ٹیم میں مڈل آرڈر میں مستقل شاندار کارکردگی دکھائی ہے، 50 سے زائد کی اوسط اور ایک رن فی گیند سے زیادہ اسٹرائیک ریٹ کے ساتھ۔ پچھلے سیزن میں وہ ون ڈے کپ کے دوسرے سب سے زیادہ رنز بنانے والے بلے باز رہے (305 رنز، اوسط 50.83)۔
یہ دونوں کھلاڑی اتوار کو پرتھ میں شائقین کے سامنے اپنا پہلا ون ڈے کھیلیں گے، جہاں پہلے میچ کے لیے تین ہزار سے کم ٹکٹیں باقی رہ گئی ہیں۔