جنوبی افریقہ کے خلاف ٹیسٹ کے لیے پاکستان کی ممکنہ پلیئنگ الیون

جنوبی افریقہ کے خلاف لاہور میں اتوار سے شروع ہونے والے پہلے ٹیسٹ کے لیے پاکستان کی ممکنہ پلیئنگ الیون سامنے آگئی۔ کرکٹ ویب سائٹ کی رپورٹ کے مطابق جنوبی افریقہ کے خلاف پہلے ٹیسٹ میچ کے لیے پاکستان ٹیم میں دو ریگولر فاسٹ بولرز اور دو اسپنرز کی شرکت متوقع ہے۔ بیٹنگ لائن اپ میں عبداللہ شفیق، امام الحق کو اوپنرز کے طور پر شامل کیا جاسکتا ہے، شان مسعود اور بابر اعظم تیسرے اور چوتھے نمبر پر بیٹنگ کے لیے آئیں گے۔
مڈل آرڈر میں سعود شکیل، وکٹ کیپر بلے باز محمد رضوان اور سلمان علی آغا بیٹنگ کے لیے آسکتے ہیں۔
اسپن میں ساجد خان اور 38 سالہ آصف آفریدی شمولیت کے مضبوط دعویدار ہیں، عبوری ہیڈ کوچ اظہر محمود مبینہ طور پر آفریدی کو ٹیسٹ ڈیبیو کرنے کی حمایت کر رہے ہیں۔ فاسٹ باؤلرز میں شاہین آفریدی کی پیس اٹیک کی قیادت یقینی ہے جبکہ نعمان علی اور خرم شہزاد کے درمیان دوسرے پیسر کا انتخاب زیر غور ہے۔ لاہور میں پہلے ٹیسٹ کے بعد دوسرا میچ 20 سے 24 اکتوبر تک راولپنڈی کرکٹ اسٹیڈیم میں کھیلا جائے گا۔