انکم ٹیکس محکمہ کی چھاپہ مار کارروائیاں ، شالیمار رہائش گاہ اور نشاط شو روم کی تلاشی

سرینگر/ یکم اکتوبر
انکم ٹیکس محکمہ نے بدھ کے روز سرینگر میں متعدد مقامات پر چھاپے مارے، جن میں ایک مقامی بزنس مین کی رہائش گاہ اور کاروباری ادارہ شامل ہے۔
افسران کے مطابق چھاپے ایک معروف ہوٹل مالک اور بزنس مین کے شالیمار میں واقع مکان پر ڈالے گئے۔ اسی دوران ان کے برین نشاط میں واقع شو روم پر بھی چھاپہ مار کارروائی کی گئی۔
انکم ٹیکس اہلکاروں کی ٹیمیں پولیس کے ہمراہ رہائش گاہ اور شو روم کی تلاشی لیتی رہیں اور مالی لین دین سے متعلق دستاویزات کا معائنہ کیا۔ یہ کارروائیاں صبح سویرے شروع ہوئیں اور اس خبر کے شائع ہونے تک جاری تھیں۔
ذرائع نے بتایا کہ یہ چھاپے مبینہ مالی بے ضابطگیوں کی جاری تحقیقات کا حصہ ہیں۔ ایک ذریعے نے کہا ’’متعلقہ ریکارڈ اور دستاویزات کی جانچ کی جارہی ہے، مزید تفصیلات آپریشن مکمل ہونے کے بعد سامنے آئیں گی۔‘‘
انکم ٹیکس محکمہ نے وسطی کشمیر کے بڈگام ضلع کے ہمہامہ علاقے میں واقع ایک ہوٹل پر بھی چھاپہ مار کارروائی انجام دی۔ایجنسیز