وادی کے نوجوان ہندوستان کے مستقبل کے معمار ہوں گے: جتیندر

سرینگر/۲۵ستمبر
مرکزی وزیر مملکت برائے سائنس اینڈ ٹیکنالوجی ڈاکٹر جتیندر سنگھ نے کہا ہے کہ جموں و کشمیر میں وہ تمام صلاحیتیں موجود ہیں جو ہندوستان کو ڈیسٹی نیشن۲۰۴۷کی جانب لے جانے میں مشعل راہ ثابت ہوں گی۔
مرکزی وزیر جمعرات کو کشمیر یونیورسٹی میں اٹل انوویشن مشن (نیتی آیوگ) کے تحت منعقدہ پروگرام کے آغاز کے موقع پر خطاب کر رہے تھے ۔ اس موقع پر لیفٹیننٹ گورنر منوج سنہا بھی موجود تھے ۔
ڈاکٹر سنگھ نے کہا کہ ہندوستان کی معیشت تیزی سے ترقی کر رہی ہے اور جیسے جیسے ملک عالمی سطح پر ترقی کی نئی بلندیوں کو چھو رہا ہے ، ویسے ہی ان علاقوں کی اہمیت بڑھتی جا رہی ہے جنہیں ماضی میں نظرانداز کیا گیا۔ ان کے مطابق جموں و کشمیر نہ صرف اپنے قدرتی وسائل بلکہ نوجوانوں کی صلاحیتوں کے بل پر ہندوستان کی ترقی میں مرکزی کردار ادا کرے گا۔
ڈاکٹر سنگھ نے اعلان کیا کہ فرنٹیئر ریجن پروگرام کے تحت جموں و کشمیر میں۵۰۰نئی آٹل ٹنکرنگ لیبارٹریاں قائم کی جائیں گی، جو ملک بھر میں قائم ہونے والی۲۵۰۰لیبارٹریوں میں سب سے زیادہ ہیں۔
ان لیبارٹریوں پر ۱۰۰کروڑ روپے کی سرمایہ کاری ہوگی، جس سے اسکولی طلبا کو روبوٹکس، تھری ڈی پرنٹنگ اور مصنوعی ذہانت جیسے جدید آلات سے سیکھنے کے مواقع ملیں گے ۔
مرکزی وزیر نے مزید کہا کہ جموں کشمیر میں ’لیونڈر مشن‘اور فلوریکلچر جیسے منصوبوں نے پہلے ہی ہزاروں اسٹارٹ اپس کو جنم دیا ہے ۔ انہوں نے کہا کہ آج تقریباً ۳۵۰۰لیونڈر اسٹارٹ اپس وادی میں کامیابی سے چل رہے ہیں اور نوجوان اپنی نوکریاں چھوڑ کر بزنس میں آرہے ہیں ۔
ڈاکٹر سنگھ نے کہا’’آنے والے بیس برسوں میں یہ نوجوان ہی ملک کی اصل طاقت ہوں گے ، اور اسی کے ذریعے جموں و کشمیر ہندوستان کی ترقی کا ماڈل بنے گا۔ ایجنسیز‘‘