ٹی ای ٹی لازمیت کی مخالفت لیکن درس و تدریس میں خلل نہیں

اجودھیا 23ستمبر(یواین آئی) اجودھیا کے پرائمری اور سیکنڈری اسکولوں میں تعینات ٹیچر احتجاج اور درس و تدریس ساتھ ساتھ کررہے ہیں۔
پرائمری ٹیچرس یونین کی قیادت میں ٹیچروں نے ٹی ای ٹی لازمیت کے خلاف کالی پٹی باندھ کا اپنی مخالفت درج کرائی اور اس کے بعد درس و تدریس کے فرائض انجام دئیے ۔
ضلع کے سوہاول ڈیراموسی واقع کمپوزٹ اسکول میں منعقد ایک احتجاجی مظاہرہ پروگرام میں ٹیچروں نے متحد ہوکر اپنے مطالبات کے لئے آواز اٹھائی۔
ہائر پرائمری ٹیچرس ایسوسی ایشن کے میٹروپولیٹن صدر گوپال کرشنا نے کہا کہ ٹیچرز کو سروس میں رہتے ہوئے ٹیچر کی اہلیت کا امتحان پاس کرنے کی شرط ایک ناقابل عمل فیصلہ ہے اور اساتذہ اس پر احتجاج کررہے ہیں۔ تاہم وہ درس و تدریس کے فرائض بھی انجام دے رہے ہیں۔
تنظیم کے ضلع صدر اودھیش پرساد نے مطالبہ کیا کہ حق تعلیم قانون 2009 کے نفاذ سے قبل اساتذہ کے لیے ٹی ای ٹی امتحان پاس کرنے کی شرط کو ختم کیا جائے ۔ انہوں نے دلیل دی کہ یہ اصول ان کے ساتھ غیر منصفانہ ہے اور ان کی خدمات کو متاثر کرتا ہے ۔
اساتذہ نے دستخط مہم چلانے کا فیصلہ کیا ہے ۔ وہ 15 اکتوبر تک وزیر اعظم، سپریم کورٹ، وزیر برائے فروغ انسانی وسائل کے مرکزی وزیر اور وزیر اعلیٰ کو ای میل کے ذریعے دستخط شدہ خط بھیجیں گے ۔ انہیں یقین ہے کہ مرکزی حکومت ان کے مطالبات پر غور کرے گی۔ اگر ان کے مطالبات نہ مانے گئے تو اساتذہ احتجاج جاری رکھیں گے ۔