دہلی پولیس کا ایس آئی رشوت لیتے ہوئے رنگے ہاتھوں گرفتار

نئی دہلی، 22 ستمبر (یو این آئی) دہلی پولیس کی ویجیلنس یونٹ نے وزیرآباد پولیس اسٹیشن کے سب انسپکٹر (ایس آئی) للت کو رشوت لیتے ہوئے رنگے ہاتھوں گرفتار کیا ہے ۔ یہ کارروائی 21 ستمبر کو ہوئی جب ویجیلنس یونٹ نے ایک خاتون کی شکایت کی بنیاد پر جال بچھا دیا۔
ڈپٹی کمشنر آف پولیس (ویجیلنس یونٹ) نے پیر کو کہا کہ 22 سالہ تانیہ سچدیوا نے بارہ کھمبا روڈ پر ویجیلنس یونٹ میں شکایت درج کرائی ہے ۔ تانیہ نے الزام لگایا کہ اس کے شوہر ہرجیت سنگھ کو براری پولیس اسٹیشن میں ایک کیس میں گرفتار کیا گیا تھا اور بعد میں سب انسپکٹر للت نے وزیرآباد پولیس اسٹیشن میں ایک اور کیس میں حراست میں لیا تھا۔
شکایت کے مطابق ایس آئی للت نے ہرجیت اور دوسرے ملزم وسیم شیخ کے خلاف کیس کو کمزور کرنے اور ضمانت حاصل کرنے میں مدد کے لیے 50,000 روپے کی رشوت طلب کی۔ 20 ستمبر کو تانیہ کی وزیر آباد پولیس اسٹیشن کی تیسری منزل پر ایس آئی للت سے ملاقات ہوئی، جہاں رشوت کی رقم 15,000 روپے میں طے پائی۔
تانیہ نے اس گفتگو کی ایک آڈیو ریکارڈنگ بھی ویجیلنس یونٹ کو پیش کی۔ 21 ستمبر کو ایس آئی للت نے تانیہ کو رشوت کی پہلی قسط ادا کرنے کے لیے بلایا۔ ویجیلنس یونٹ نے شام کو وزیر آباد تھانے میں جال بچھا دیا۔ تانیہ اپنے بھائی کے ساتھ تیسری منزل پر پہنچی، جہاں ایس آئی للت نے رشوت کی رقم وصول کی۔ جیسے ہی لین دین ہوا، ویجیلنس یونٹ کی ٹیم فوری طور پر جائے وقوعہ پر پہنچی اور کارروائی شروع کی۔ ایس آئی للت نے چھاپے سے بچنے کے لیے رشوت کی رقم چھپانے کی کوشش کی، لیکن ناکام رہے اور پکڑے گئے أ
اس معاملے میں بارہ کھمبا روڈ ویجیلنس پولیس اسٹیشن میں انسداد بدعنوانی ایکٹ کے تحت ایف آئی آر درج کی گئی ہے ۔ تفتیش جاری ہے ۔ اس کارروائی سے ویجیلنس یونٹ نے بدعنوانی کے خلاف سخت پیغام دیا ہے اور عوام سے اپیل کی ہے کہ وہ اس طرح کی سرگرمیوں کی اطلاع فوری طور پر ویجیلنس یونٹ کو دیں۔