اولمپین گرجیت کور نے سُرجیت ہاکی اکیڈمی کے کھلاڑیوں کی حوصلہ افزائی کی

جالندھر، 20 ستمبر (یواین آئی) ہندوستانی اولمپین کھلاڑی گرجیت کور نے جالندھر کی سُرجیت ہاکی اکیڈمی کا دورہ کرتے ہوئے وہاں اکیڈمی کے ابھرتے ہوئے کھلاڑیوں کی حوصلہ افزائی کی ۔ انہوں نے نوجوان کھلاڑیوں سے اپنے تجربات مشترک کیے اور انہیں قومی اور بین الاقوامی سطح پر شاندار کارکردگی دکھانے پر زوردیا۔
اس موقع پر اکیڈمی کے سی ای او اقبال سنگھ سندھو نے اولمپین کھلاڑی کا پُرجوش استقبال کیا اور انہیں اکیڈمی کے کھلاڑیوں اور کوچز سے ملوایا۔ اس دوران گرجیت کور نے کھلاڑیوں سے گفتگو کی اور ان کے سوالات کے جوابات دیے۔
ٹوکیو اولمپکس میں ٹیم کی شاندار کارکردگی میں اہم کردار ادا کرنے والی گرجیت کور نے کھلاڑیوں کو خطاب کرتے ہوئے کہا کہ کامیابی حاصل کرنے کے لیے سخت محنت، نظم و ضبط اور لگن ضروری ہے۔ انہوں نے نوجوان کھلاڑیوں کو ہمیشہ اپنے خوابوں پر یقین رکھنے کی ترغیب دی۔
اقبال سنگھ سندھو نے اس حوصلہ افزا دورے پر خوشی کا اظہار کرتے ہوئے کہا، "گرجیت کور جیسے کھلاڑی کا یہاں آکر ہمارے نوجوانوں کو متاثر کرنا ہمارے لیے بہت فخر کی بات ہے۔ ان کا تجربہ ہمارے کھلاڑیوں کے لیے بے حد فائدہ مند ثابت ہوگا۔”