سینٹ لوسیا کِنگز کو ہرا کر ٹرِنباگو نائٹ رائیڈرز سی پی ایل کے فائنل میں

گیانا، 20 ستمبر (یواین آئی) ایلیکس ہیلز (ناٹ آؤٹ 58)، کپتان نکولس پورن (50) کی شاندار نصف سنچریوں کے بعد عثمان طارق (چار وکٹ) اور سنیل نرائن (تین وکٹ) کی زبردست کارکردگی کی بدولت ٹرِنباگو نائٹ رائیڈرز نے کوالیفائر 2 میں دفاعی چیمپئن سینٹ لوشیا کِنگز کو 56 رنز سے شکست دے کر سی پی ایل 2025 کے فائنل میں جگہ بنا لی۔
ایلیمینیٹر میں 143 رنز کی ناٹ آوٹ شراکت داری کرنے والے ایلیکس ہیلز اور نکولس پورن کی بیٹنگ جوڑی نے ایک بار پھر شاندار نصف سنچریاں بنائیں اور چار بار کی سی پی ایل چیمپئن ٹرِنباگو ٹیم کو 20 اوور میں چار وکٹ پر 194 رنز کے بڑے اسکور تک پہنچایا۔ اس کے بعد عثمان طارق کے چار اور سنیل نرائن کے تین وکٹوں کی شاندار گیندبازی نے سینٹ لوشیا کِنگز کو مقررہ 20 اوور میں آٹھ وکٹ پر صرف 138 رنز تک محدود کر دیا اور وہ 56 رنز سے میچ ہار گئے۔ سینٹ لوشیا کی جانب سے ٹِم سیفرٹ نے سب سے زیادہ 57 رنز بنائے جبکہ ٹِم ڈیوڈ نے 28، جانسن چارلس نے 17، راسٹن چیز نے 16 اور ایرن جونز نے 12 رنز بنائے۔ ٹرِنباگو کے لیے عثمان طارق نے چار اور سنیل نرائن نے تین وکٹیں حاصل کیں جبکہ کیرون پولارڈ نے ایک وکٹ لیا۔
فائنل میں ٹرِنباگو نائٹ رائیڈرز کا مقابلہ گیانا ایمیزون واریئرز سے ہوگا۔
بلے بازی کرتے ہوئے ٹرِنباگو کے لیے ایک بار پھر کولن منرو صرف چھ رنز بنا کر آؤٹ ہو گئے، جس کے بعد دوسرے اوور میں ہیلز اور پورن کی جوڑی کریز پر آئی۔ پورن نے ابتدا میں جارحانہ انداز اپنایا کیونکہ ہیلز کو گیند کو ٹائم کرنے میں دشواری ہو رہی تھی۔ پانچویں اوور میں انہوں نے اے جوزف کی گیند پر لانگ آن پر چھکا لگا کر تیزی سے رنز بنانا شروع کیا اور پھر ایک ہی اوور میں 17 رنز جمع کئے جس میں 10 ایکسٹرا رنز بھی شامل تھے۔ اس کے بعد پاور پلے کے آخری اوور میں ایک چھکا اور تین چوکے لگا کر دونوں کے درمیان 50 رنز کی شراکت مکمل ہوئی جب ہیلز اب بھی صرف چھ رنز پر تھے۔ دونوں کے درمیان دوسرے وکٹ کے لیے 73 رنز کی شراکت ہوئی۔ دسویں اوور میں راسٹن چیز نے نکولس پورن کو آؤٹ کر کے اس پارٹنرشپ کو توڑا۔ پورن نے 32 گیندوں میں پانچ چوکے اور چار چھکے لگاتے ہوئے 50 رنز بنائے۔ تیسرے وکٹ کے طور پر کیرون پولارڈ 26 گیندوں پر 35 رنز بنا کر آؤٹ ہوئے۔ اینڈرے رسل نے 12 گیندوں میں 28 رنز جوڑے۔ ٹرِنباگو نے چار وکٹ پر 194 رنز کا مضبوط اسکور بنایا۔