یمن سے اسرائیلی شہر ایلات پر ڈرون سے حملہ

یمن سے اسرائیلی شہر ایلات پر ڈرون سے حملہ کیا گیا ہے ، جس کی ویڈیو بھی گردش کررہی ہے ۔
غیر ملکی ذرائع ابلاغ کے مطابق یمن سے داغا جانے والا ڈرون اسرائیلی ساحلی شہر ایلات میں ایک ہوٹل کے قریب جاگرا تاہم ڈرون حملے میں کسی جانی نقصان کی اطلاع نہیں ملی۔
ڈرون حملے کی سی سی ٹی وی فوٹیج بھی منظر عام پر آگئی ہے ، جس میں ڈرون کو ایک عمارت کے قریب گرتے دیکھا جاسکتا ہے ۔
واضح رہے کہ رواں ماہ کے دوران اسرائیل نے بھی متعدد بار یمن کو نشانہ بنایا ہے ۔
حوثی ترجمان کی جانب سے دعویٰ سامنے آیا تھا کہ یمن پر اسرائیلی حملے کو کچھ حد تک ناکام بنادیا ہے ، میزائل دفاعی نظام استعمال کیا گیا۔
حوثی فوجی ترجمان یحییٰ سریع کا کہنا تھا کہ اسرائیلی دراندازی کیخلاف میزائل دفاعی نظام استعمال کیا گیا، جس کے ذریعے ان حملوں کو کسی حد تک ناکام بنایا گیا، اسرائیلی طیاروں کو ہدف تک پہنچنے سے پہلے واپس جانے پر مجبور کیا گیا۔
حوثی فوجی ترجمان کا کہنا تھا کہ اسرائیلی جارحیت کا بڑا حصہ ناکام ہوا االلہ کا شکر ہے ، اسرائیل کیخلاف کارروائیاں غزہ پر جنگ ختم ہونے تک جاری رہیں گی