پارسل ٹرین سے میوہ صنعت کو کافی فروغ ملے گاـ:وویک کمار

سرینگر/۱۵ستمبر
ڈویژنل ریلوے مینیجر جموں وویک کمار کا کہنا ہے کہ اعلیٰ صلاحیت والی پارسل ٹرین سروس کے آغاز سے کشمیر کی معیشت کو فروغ ملے گا اور ہائی وے کی رکاوٹوں کے باوجود قابل اعتماد ٹرانسپورٹ یقینی ہوگا۔
کمار نے کہا کہ یہ ایک تاریخی موقع ہے کیونکہ پہلی بار ٹرین کے ذریعے مال سری نگر سے ملک کے باقی حصوں تک پہنچے گا۔
منیجر نے ان باتوں کا اظہار پیر کو لیفٹیننٹ گورنر منوج سنہا کی طرف سے بڈگام سے دہلی تک پہلی پارسل ٹرین کو جھنڈی دکھا کر روانہ کرنے کے بعد نامہ نگاروں کے ساتھ بات کرنے کے دوران کیا۔
کمار نے کہا ’’یہ ایک تاریخی موقع ہے کہ پہلی بار سری نگر سے ٹرین کے ذریعے مال ملک کے باقی حصوں میں پہنچے گا‘‘۔
ان کا کہنا تھا’’سیلاب سے خطے میں سڑکیں بند ہوگئی ہیں جس کی وجہ سے میوہ خراب ہو رہا تھا اس کے پیش نظر ریلوے نے روزانہ بنیادوں پر ایک پارسل ٹرین سروس شروع کی تاکہ یہاں کا سیب اور دوسری پیداوار ملک کے باقی حصوں میں پہنچ سکے ‘‘۔
کمار نے کہا کہ یہ ٹرین۸ ڈبوں پر مشتمل ہے اور ہر ڈبے میں۲۳ٹن کی گنجائش ہے اور س طرح روزانہ۱۷۰ٹن سے زیادہ مال ملک کے حصوں میں پہنچ جائے گا۔
منیجر نے کہا کہ یہ ٹرین روزانہ چلے گی اور ہر صبح۶بجے یہاں سے روانہ ہوگی اور بڑی برہمنہ جموں میں اس کا ایک پڑاؤ ہے جہاں سے یہ آدرش نگر دہلی روانہ ہوگی۔
ان کا کہنا تھا کہ یہ ایک ٹائم ٹیبل ٹرین ہے اور ہرصبح مقررہ وقت پر چلے گی۔منیجر نے کہا کہ یہ ریولے کی تاریخ اور جموں و کشمیر کی تاریخ میں ایک سنہرا باب ہے ۔انہوں نے کہا کہ اس سے میوہ صنعت کو کافی فروغ ملے گا۔