ویمنز بلائنڈ ورلڈ کپ : نیپال میں کشیدگی کے باعث پاکستان کے میچ سری لنکا منتقل کیے جانے کا امکان

اسلام آباد، 13 ستمبر (یواین آئی) نیپال میں کشیدگی کے باعث ویمنز بلائنڈ ورلڈ کپ کے پاکستان کے میچز کا انعقاد خطرے میں پڑ گیا۔
ویمنز بلائنڈ کرکٹ ورلڈکپ میں پاکستان نے اپنے میچز نیپال میں کھیلنا تھے۔ پاکستان بلائنڈ ٹیم نے ہندوستان جانے سے انکار کر دیا تھا۔ پاکستانی ٹیم کے انکار کی وجہ سے ہائبرڈ ماڈل کے تحت پاکستان کے میچز نیپال منتقل کردیے گئے تھے۔
نیپال میں موجودہ حالات کی وجہ سے ویمنز بلائنڈ ورلڈکپ میں پاکستان کے میچز سری لنکا منتقل کیے جانے کا امکان ہے۔
جیونیوز کے مطابق ورلڈ بلائنڈ کونسل کے صدر سید سلطان شاہ نے کہا کہ ورلڈ بلائنڈ کرکٹ کونسل کی ایگزیکٹو کمیٹی کا اجلاس پیر کو آن لائن ہوگا۔
انہوں نے کہا کہ اجلاس میں ویمنز بلائنڈ ورلڈ کپ میں پاکستان کے میچز نیپال سے کسی دوسرے ملک منتقل کرنے کا فیصلہ کیا جائے گا، پاکستان کی میچز کی تاریخ میں تبدیلی ممکن نہیں۔ پاکستان 11 سے 25 نومبر تک اپنے میچز کھیلے گا۔