مانچسٹر، 13 ستمبر (یو این آئی) جنوبی افریقہ کے خلاف انگلینڈ کا مقابلہ ایک تاریخی اور ریکارڈ توڑ مقابلے میں تبدیل ہو گیا، جہاں چوکوں اور چھکوں کی بارش ہوئی، کئی ناقابلِ فراموش لمحے رقم ہوئے اور ریکارڈز کا سلسلہ مسلسل ٹوٹتا رہا۔
میزبان ٹیم نے جمعہ کی رات دو وکٹوں کے نقصان پر 304 رنز بنائے، جو کہ مردوں کے ٹی 20 بین الاقوامی مقابلوں میں کسی بھی ٹیم کا اب تک کا سب سے بڑا اسکور ہے اور ساتھ ہی انگلینڈ کا بھی بہترین ٹی 20 اسکور ہے۔
مردوں کے ٹی 20 بین الاقوامی کرکٹ میں یہ تیسرا موقع تھا جب کسی ٹیم نے 300 رنز کا ہندسہ عبور کیا۔
اس سے قبل زمبابوے نے اکتوبر 2024 میں گامبیا کے خلاف 344/4 کا ریکارڈ اسکور بنایا تھا۔ اس کے بعد نیپال نے ستمبر 2023 میں منگولیا کے خلاف 314/3 بنائے تھے۔
ٹیموں کی بات کی جائے تو انگلینڈ نے اکتوبر 2024 میں بنگلہ دیش کے خلاف ہندوستان کے 297/6 کے اسکور کو پیچھے چھوڑ دیا۔
فل سالٹ اور جوس بٹلر نے شاندار اوپننگ شراکت کے ساتھ ابتدا ہی سے جنوبی افریقی گیند بازوں کی اچھی خبر لی۔
انگلینڈ نے پاور پلے میں ہی 100 رنز مکمل کر لیے، جب کہ اوپننگ جوڑی نے صرف 47 گیندوں پر 126 رنز جوڑے۔
سالٹ نے اپنے کیریئر کی یادگار اننگز کھیلتے ہوئے صرف 60 گیندوں پر ناٹ آؤٹ 141 رنز بنائے، جو کہ ٹی20 انٹرنیشنل میں کسی انگلش بلے باز کا سب سے بڑا انفرادی اسکور ہے۔
ان کی سنچری صرف 39 گیندوں میں مکمل ہوئی، جو کسی انگلش بلے باز کی جانب سے اب تک کی تیز ترین سنچری ہے اور انہوں نے 2021 میں پاکستان کے خلاف لیام لیونگسٹون کے ریکارڈ کو بھی توڑ دیا۔
29 سالہ سالٹ کی ٹی 20 بین الاقوامی سنچریوں کی تعداد اب چار ہو گئی ہے، جس سے وہ سوریا کمار یادو کے ساتھ آ کھڑے ہوئے ہیں، جب کہ میکسویل اور روہت شرما پانچ پانچ سنچریوں کے ساتھ سرفہرست ہیں۔
جوس بٹلر نے بھی 18 گیندوں پر نصف سنچری بنا کر زبردست کردار ادا کیا، جو کہ ٹی20 انٹرنیشنل میں انگلینڈ کی جانب سے تیسری تیز ترین نصف سنچری ہے۔
اتنے مشکل ہدف کے تعاقب میں جنوبی افریقہ کے پاس ابتدا سے ہی جارحانہ بلے بازی کے سوا کوئی چارہ نہیں تھا، لیکن ان کی اننگز 158 رنز پر سمٹ گئی۔
نتیجے کے طور پر، انگلینڈ نے سیریز 1-1 سے برابر کر دی۔ آئی سی سی کی ایک رپورٹ کے مطابق، فیصلہ کن مقابلہ اتوار، 14 ستمبر کو ناٹنگھم میں کھیلا جائے گا۔
