ہر ٹیم کے خلاف بے خوف ہوکر کھیلیں گے : صائم ایوب

اسلام آباد، 13 ستمبر (یواین آئی) پاکستان کرکٹ ٹیم کے سلامی بلے باز صائم ایوب نے کہا ہے کہ ہر ٹیم کے خلاف بے خوف کرکٹ کھیلیں گے، اور ہندوستان بھی اس سے مستثنیٰ نہیں، ہمارا ہدف صرف ہندوستان کے خلاف میچ نہیں بلکہ ایشیا کپ کی ٹرافی جیتنا بھی ہے۔
یاد رہے کہ ایشیا کپ میں کل ہندوستان اور پاکستان کا میچ دبئی میں کھیلا جانا ہے ۔
جنگ نیوز کے مطابق دبئی میں ہند۔ پاک میچ سے قبل پریس کانفرنس میں صائم ایوب نے کہا کہ پلیئنگ الیون پِچ کی صورتحال کے مطابق منتخب کرتے ہیں، خشک پِچ پر اسپنرز کو موقع ملتا ہے۔
صائم ایوب نے کہا کہ ہر میچ میں بہتر کرنے کی کوشش کرتے ہیں، ٹیم کے کھلاڑی پراعتماد ہیں۔ منیجمنٹ کا مشورہ ہے ماضی سے سیکھیں اور اپنی توجہ موجودہ میچ پر مرکوز کریں۔
انہوں نے کہا کہ ٹیم کو جتوانا سب سے بڑا چیلنج ہے، دباؤ میں رہ کر فتح حاصل کرنا ضروری ہے، ٹیم ورک کے ساتھ بڑا میچ جیتنا مقصد ہے۔