ڈونلڈ ٹرمپ نے اپنی صحت سے متعلق خبروں کو جعلی قرار دیا

امریکی صدر ڈونلڈ ٹرمپ نے اپنی صحت سے متعلق خبروں کو جعلی قرار دے دیا ہے ۔
روئٹرز کے مطابق ڈونلڈ ٹرمپ نے منگل کے روز سوشل میڈیا پر اپنی صحت سے متعلق افواہوں کو مسترد کرتے ہوئے کہا کہ وہ لیبر ڈے ویک اینڈ کے دوران میڈیا انٹرویوز دینے اور ورجینیا میں اپنے گولف کورس کا دورہ کرنے میں مصروف رہے ۔
وائٹ ہاؤس کے اوول آفس میں صحافیوں سے گفتگو کرتے ہوئے انھوں نے کہا کہ ‘‘میں ہفتے کے آخر میں بہت سرگرم تھا۔’’ جب ان سے پوچھا گیا کہ کیا وہ اپنی صحت سے متعلق خبروں سے آگاہ ہیں تو انھوں نے انھیں ‘‘جعلی’’ قرار دیا۔
ڈونلڈ ٹرمپ جنوری میں۷۹برس کے ہو گئے ہیں، اور اس طرح امریکی صدارت سنبھالنے والے سب سے معمر فرد بن چکے ہیں۔ سوشل میڈیا پلیٹ فارم ایکس پر گزشتہ ہفتے ان کی صحت سے متعلق قیاس آرائیاں گردش کرتی رہیں، ان پوسٹوں میں اس بات کی نشان دہی کی گئی تھی کہ گزشتہ ہفتے کے آخر میں صدر کا کوئی عوامی شیڈول نہیں تھا۔
’یو ایس اے ٹوڈے ‘ میں جمعرات کو نائب صدر جے ڈی وینس کا انٹرویو شائع ہوا، جس میں وینس سے پوچھا گیا کہ کیا وہ کمانڈر ان چیف کا کردار سنبھالنے کے لیے تیار ہیں، تو انھوں نے کہا کہ انھیں یقین ہے کہ ٹرمپ ‘‘ٹھیک حالت میں’’ ہیں، تاہم انھوں نے یہ بھی اشارہ دیا کہ اگر صدر کے ساتھ کچھ ہوتا ہے تو وہ ذمہ داری سنبھالنے کے لیے تیار ہیں۔
منگل سے قبل، ٹرمپ کی صحافیوں کے ساتھ آخری طویل گفتگو ایک ہفتہ قبل کابینہ کے اجلاس کے دوران ہوئی تھی۔۲۶؍اگست کو ہونے والا یہ اجلاس تین گھنٹے سے زائد جاری رہا تھا، جو صدر کے طور پر ان کی کیمرے پر سب سے طویل موجودگی تھی۔ لیبر ڈے ویک اینڈ کے دوران، رپورٹرز نے انھیں ہر روز وائٹ ہاؤس سے نکلتے ہوئے دیکھا جب وہ اپنے گولف کورس کا دورہ کر رہے تھے ۔
ٹرمپ نے۱۱؍اپریل کو واشنگٹن کے نواحی علاقے میں واقع والٹر ریڈ نیشنل ملٹری میڈیکل سینٹر میں ایک مکمل طبی معائنہ بھی کروایا تھا۔ اس معائنے میں ان کے دل کی دھڑکن معمول کے مطابق پائی گئی اور کوئی بڑی طبی مسئلہ سامنے نہیں آیا، جیسا کہ وائٹ ہاؤس کی طرف سے جاری کردہ سرکاری نتائج میں بتایا گیا۔
۱۷جولائی کو، وائٹ ہاؤس کی ترجمان کیرولین لیوٹ نے کہا تھا کہ ٹرمپ کو اپنی ٹانگوں کے نچلے حصے میں سوجن اور دائیں ہاتھ پر خراشوں کا سامنا تھا، جب ان کی تصاویر میں سوجے ہوئے ٹخنے اور ہاتھ پر میک اپ لگا ہوا دیکھا گیا۔ ان کے معالج ڈاکٹر شون باربابیلا نے ایک خط میں بتایا کہ طبی معائنے سے ثابت ہوا کہ ٹانگوں کا مسئلہ ’کرونک وینس انسفیشنسی‘کی وجہ سے ہے ، جو کہ۷۰سال سے زائد عمر کے افراد میں عام اور غیر خطرناک حالت ہے ۔
ڈاکٹر نے مزید بتایا کہ ہاتھ پر خراشیں معمولی نوعیت کی نرم بافتوں میں جلن سے مطابقت رکھتی ہیں، جو بار بار ہاتھ ملانے اور اسپرین کے استعمال سے ہو سکتی ہیں، اسپرین وہ دوا ہے جو ٹرمپ دل کی بیماریوں سے بچاؤ کے معمول کے تحت لیتے ہیں۔