کرناٹک کے بی جے پی رکن اسمبی کے خلاف مقدمہ درج

بنگلورو، 3 ستمبر (یو این آئی) کرناٹک پولیس نے آج ہری ہر کے بی جے پی رکن اسمبلی بی پی ہریش کے خلاف پولیس سپرنٹنڈنٹ (ایس پی) اوما پرشانت کی مبینہ طور پر توہین کرنے کے الزام میں فرسٹ انفارمیشن رپورٹ (ایف آئی آر) درج کی اور دعویٰ کیا کہ ایس پی اوما کانت نے داوڑ گیرے ضلع میں کانگریس لیڈروں کے ‘پالتو کتے کی طرح کام کیا’
ایس پی کی شکایت کے بعد کے ٹی جے نگر پولیس اسٹیشن میں ایف آئی آر درج کی گئی اور ایم ایل اے کے خلاف دفعہ 132،351 اور 79 کے تحت مقدمہ درج کیا گیا ہے ۔
رکن اسمبلی ہریش کا یہ ریمارکس آج داوڑ گیرے میں رپورٹرز گلڈ کے زیر اہتمام ایک پروگرام کے دوران آیا، جہاں انہوں نے الزام لگایا کہ ایس پی نے عوام کے منتخب نمائندے کو نظر انداز کرتے ہوئے کانگریس قائدین کو اہمیت دی۔
ہریش نے خاص طور پر ذکر کیا کہ ایس پی اوما پرشانت نے انہیں عوامی تقریبات میں دیکھتے ہی عجیب و غریب چہرے بنائے ، جب کہ مبینہ طور پر کانگریس لیڈروں رکن اسمبلی شمانور شیواشنکرپا، کان ، ارضیات اور باغبانی کے وزیر ایس ایس ملیکارجن اور داوڑ گیرے سے رکن پارلیمنٹ ملکارجن کی اہلیہ پربھا داوناج کا انتظار کر رہے تھے ۔