نتیش نے پترپکش میلے کی تیاریوں کا جائزہ لیا

گیاجی، 03 ستمبر (یواین آئی) بہار کے وزیر اعلی نتیش کمار نے بدھ کو گیاجی کے وشنوپد مندر میں پوجا کی اور پترپکش میلے کی تیاریوں کا جائزہ لیا۔
مسٹر کمار آج ہیلی کاپٹر کے ذریعے گیاجی پہنچے ، وشنوپد مندر میں پوجا کی اور دیوگھاٹ کا جائزہ لیا۔
اس کے بعد وزیر اعلیٰ کلکٹریٹ احاطے میں پہنچے ، جہاں انہوں نے انتظامی عہدیداروں کے ساتھ پترپکش میلے کی تیاریوں کی تفصیلات دریافت کیں۔
مسٹر کمار نے چاکند ہائی اسکول سے 13 اسکیموں کا سنگ بنیاد رکھا۔ اس کے بعد انہوں نے بیلاگنج بس اسٹینڈ کے قریب قومی جمہوری اتحاد (این ڈی اے ) حکومت کے کئی وزرائکے ہمراہ کارکنوں سے بات چیت بھی کی اس دوران عوام سے خطاب کرتے ہوئے انہوں نے کہا کہ سال 2005 سے پہلے بہار میں ترقی نام کی کوئی چیز نہیں تھی۔ خواتین کی بہبود سے لے کر تعلیم اور سڑکوں تک کوئی کام نہیں ہوتا تھا،لیکن 2005 کے بعد ان کی حکومت نے ہر شعبے میں کام کیا ہے اور آئندہ بھی جاری رکھے گی۔ انہوں نے عوام سے اپیل کرتے ہوئے کہا کہ اپنے ایم ایل اے کو علاقے کی ضروریات کے بارے میں بتائیں، حکومت تمام ضروریات پوری کرے گی۔ انہوں نے لوگوں سے کہا کہ آج ان کے علاقے سے متعلق 13 اسکیموں کو منظوری دی گئی ہے ۔ ان میں تین آبپاشی، دو فلائی اوور، پانچ سڑکوں کی تعمیر، دو پارک اور امام گنج میں ایک ڈگری کالج کا سنگ بنیاد رکھا گیا ہے ۔
مسٹر کمار نے کہا کہ ان کی حکومت نے مدرسہ کے اساتذہ کو سرکاری اساتذہ کے برابر تنخواہ دی اور حکومتی بندوبست کے بعد اب قبرستان کی زمین پر کوئی تنازعہ نہیں ہے ۔ انہوں نے کہا کہ اگر عوام مستقبل میں بھی ساتھ دیں تو ریاست میں ترقیاتی کام تیزی سے ہوں گے ۔