سنہا کی سینئر اَفسران سے بات چیت‘ سیلابی صورتحال کا جائزہ

لیفٹیننٹ گورنر منوج سِنہانے صوبائی کمشنر جموں رمیش کمار اور دیگر سینئر افسران سے بات چیت کی اور سیلاب کی صورتحال اور بچاؤ و اِمدادی کارروائیوں کا جائزہ لیا۔
سنہا نے اَفسران کو ہدایت دی کہ جن علاقوں میں سیلاب کا پانی کم ہو رہاہے وہاں ترجیحی بنیادوں پر بجلی، مواصلات اور پانی کی سپلائی کوبحال کیا جائے۔ زائد اَز۵۰۰۰؍ اَفراد کو نشیبی اور زیرِ آب علاقوں سے محفوظ مقامات پر منتقل کیا گیا ہے۔
لیفٹیننٹ گورنر نے کہا کہ فوج‘ این ڈِی آر ایف اور ایس ڈِی آر ایف، صوبائی کمشنرکے دفتر کے ساتھ مل کر کام کر رہے ہیں اور یہ یقینی بنایا جا رہا ہے کہ ِامدادی سامان کی مناسب مقدار دستیاب ہو اور متاثرہ اَفراد کو ہر ممکن مدد فراہم کی جا رہی ہو۔
سنہا نے صوبہ جموںکے مختلف حصوں میں اس آفات سماوی سے متاثرہ تمام اَفراد اور اِمدادی کاموں میں حصہ لینے والے بہادر رضاکاروں کی خیریت اور حفاظت کے لئے دعا بھی کی۔
لیفٹیننٹ گورنر نے ایکس پر اَپنے ایک پیغام میں کہا ’’اُنہوںنے صوبائی کمشنر جموں رمیش کمار اور دیگر سینئر اَفسران سے بات چیت کی اور سیلاب کی صورتحال اور بچاؤ و اِمدادی کارروائیوں کا جائزہ لیا اور جہاں پانی کم ہو رہا ہے وہاں بجلی، مواصلات اور پانی کی فراہمی کو ترجیحی بنیادوں پر بحال کرنے کی ہدایت دی‘‘۔
زائد اَز۵۰۰۰؍ اَفراد کو نشیبی اور زیرِ آب علاقوں سے محفوظ مقامات پر منتقل کیا گیا۔ فوج، این ڈِی آر ایف اور ایس ڈِی آر ایف، صوبائی کمشنر کے دفتر کے ساتھ مل کر سے کام کر رہے ہیں اور ہم یہ یقینی بنا رہے ہیں کہ اِمدادی سامان کی مناسب فراہمی ہو اور متاثرہ اَفراد کو ہر ممکن مدد دی جا رہی ہے۔‘‘
دریں اثنا لیفٹیننٹ گورنر‘ منوج سنہا نے آج شری ماتا ویشنو دیوی مندر پر اردھکواری کے قریب لینڈ سلائیڈنگ کے ایک بدقسمتی واقعے میں زخمی ہونے والے عقیدت مندوں سے ملاقات کی جو شری ماتا ویشنو دیوی نارائن سپر اسپیشلٹی اسپتال ، کٹرا میں زیر علاج ہیں اور ان کی صحت کے بارے میں دریافت کیا۔
سینئر ڈاکٹروں کی ٹیم نے لیفٹیننٹ گورنر کو زخمیوں کی صحت کی حالت اور جاری طبی طریقہ کار سے آگاہ کیا۔
لیفٹیننٹ گورنر نے ڈاکٹروں اور اسپتال انتظامیہ کو زخمیوں کی جلد صحت یابی کے لیے بہترین ممکنہ علاج کو یقینی بنانے کی ہدایت کی۔ بتایا گیا کہ ۱۳, افراد اس وقت ایس ایم وی ڈی نارائن سپر اسپیشلٹی اسپتال کٹرا میں زیر علاج ہیں اور ان کی حالت مستحکم ہے۔
لیفٹیننٹ گورنر نے ایمرجنسی ریسپونڈرز ، شری ماتا ویشنو دیوی شرائن بورڈ کے ملازمین اور شہریوں کا ان کی مثالی مداخلتوں کے لیے شکریہ ادا کیا جس نے بہت سی جانیں بچائیں۔
میڈیا سے بات چیت کرتے ہوئے لیفٹیننٹ گورنر نے کہا ’’یاترا کو کل خراب موسم کی وجہ سے معطل کر دیا گیا تھا۔ بادل پھٹ گیا اور اردھکواری میں عقیدت مند اس میں پھنس گئے۔ یہ ایک دل دہلا دینے والی قدرتی آفت تھی ، جس میں ہم نے قیمتی جانیں گنوائیں۔ ہم سوگوار خاندانوں کو ہر ممکن مدد فراہم کر رہے ہیں‘‘۔
لیفٹیننٹ گورنر نے مرنے والوں کے لواحقین کو معاوضے کا بھی اعلان کیا۔انہوں نے کہا کہ شرائن بورڈ اور انتظامیہ متاثرہ خاندانوں کو تمام ضروری امداد فراہم کر رہی ہے۔
شرائن بورڈ کی پالیسی کسی بدقسمت واقعے میں مرنے والے کسی بھی فرد کے لواحقین کو ۵لاکھ روپے کی امدادی رقم فراہم کرتی ہے۔ ایس ڈی آر ایف کی طرف سے اضافی ۴ لاکھ روپے فراہم کیے جائیں گے۔
لیفٹیننٹ گورنر نے وزیر اعظم نریندر مودی اور وزیر داخلہ ‘امت شاہ کو سیلاب کی صورتحال اور جموں و کشمیر کے مختلف اضلاع میں جاری امدادی اور بچاؤ کی کارروائیوں سے بھی آگاہ کیا ہے۔انہوں نے حکام کو ہنگامی حالات سے نمٹنے کے لیے زیادہ سے زیادہ تیاری اور اپنے عہدوں پر عملے کی موجودگی کی ہدایت کی ہے۔