مودی نے ویشنو دیوی لینڈ سلائیڈنگ میں یاتریوں کی موت پر رنج و غم کا اظہار کیا

نئی دہلی، 27 اگست (یواین آئی) وزیر اعظم نریندر مودی نے جموں و کشمیر میں شری ماتا ویشنو دیوی یاترا کے راستے کے قریب مٹی کے تودے گرنے سے جان و مال کے نقصان پر دکھ کا اظہار کیا ہے ۔
بدھ کو سوشل میڈیا پر ایک تعزیتی پیغام میں مسٹر مودی نے لکھاکہ "شری ماتا ویشنو دیوی مندر کے راستے پر لینڈ سلائیڈنگ کی وجہ سے ہونے والا جانی نقصان افسوسناک ہے ۔ میری تعزیت سوگوار خاندانوں کے ساتھ ہے ۔ میں زخمیوں کے جلد صحت یاب ہونے کے لیے نیک خواہشات پیش کرتا ہوں۔ انتظامیہ تمام متاثرہ لوگوں کی مدد کر رہی ہے ۔ میں سب کی حفاظت اور تندرستی کے لیے دعا گو ہوں۔”
وزیر اعظم نے اپنے مراسلے میں کہاکہ "میں نے جموں و کشمیر کے حکام سے بات کی ہے اور بچاؤ اور امدادی کارروائیاں جنگی بنیادوں پر کی جا رہی ہیں۔ متاثرہ لوگوں کو ہر ممکن مدد فراہم کی جا رہی ہے "۔ غور طلب ہے کہ شری ویشنو دیوی راستے کے اردکواری سیکشن کے قریب شدید بارش کی وجہ سے مٹی کے تودے گرنے سے 10 سے زیادہ لوگوں کی موت ہو گئی ہے اور بہت سے لوگ زخمی ہو گئے ہیں۔ جس سے علاقے میں ٹریفک میں خلل پڑا ہے ۔ امدادی کارروائیاں جاری ہیں اور انتظامیہ متاثرہ علاقے میں یاتریوں اور رہائشیوں کی حفاظت کو یقینی بنانے کے لیے کام کر رہی ہے ۔