حکومت ماہی گیروں کے لیے روزگار کے مواقع بڑھانے کے لیے مفاہمت نامے پر دستخط کرے گی

نئی دہلی، 27 اگست (یو این آئی) اقلیتی امور اور ماہی پروری کے مرکزی وزیر مملکت جارج کورین جمعرات کے روز ہنر مندی کی تربیت اور خواتین کاروباریوں کی ترقی کے پروجیکٹ کے لیے اقلیتی امور کی وزارت اور آئی سی اے آر۔ سینٹرل میرین فشریز ریسرچ انسٹی ٹیوٹ کے درمیان مفاہمت نامہ پر دستخط کریں گے ۔
پی ایم وکاس یوجنا کے تحت، اقلیتی امور کی وزارت آئی سی اے آر-سی ایم ایف آر آئی کے ساتھ کیرالہ میں اس پروجیکٹ کے تنفیذی ادارے کے طور پر شراکت کر رہی ہے جس کا مقصد اقلیتی طبقوں کے 690 افراد کو تربیت دینا ہے ۔ اس اقدام کا مقصد تعلیم، ہنر مندی کی ترقی اور انٹرپرائز کے فروغ کے ذریعے اقلیتی برادریوں کو بااختیار بنانا ہے ۔
ان 690 امیدواروں میں سے 270 کو غیر روایتی ماہی گیری پر مرکوز ہنر کی تربیت دی جائے گی۔ ان میں سے 90 کو ہیچری فش فارمنگ اور 180 کو کیج فش فارمنگ کی تربیت دی جائے گی۔ توقع ہے کہ ان مخصوص مہارتوں سے ماہی گیروں کی ذاتی روزگار کی صلاحیت کو نمایاں طور پر بہتر بنانے اور انہیں سماجی و اقتصادی لحاظ سے بااختیار بنانے میں مدد ملے گی۔ مزید برآں، 420 خواتین کو لیڈر شپ اور انٹرپرینیورشپ ڈیولپمنٹ پروگراموں میں حصہ لینے کے لیے حوصلہ افزائی کی جائے گی تاکہ وہ اپنے ادارے قائم کرنے اور ان کا نظم کرنے پر قادر ہوسکیں۔
تمام شرکاء کو اپنی تربیت کے دوران وظیفہ ملے گا۔ مہارت کی ترقی کے علاوہ، اس منصوبے کا مقصد شرکاء کو ذاتی روزگار کے مواقع کی طرف رہنمائی کرنا بھی ہے ۔