نہیں صاحب ایسے تھوڑی نا چلے گا… بالکل بھی نہیں چلے گا ‘چل نہیں سکتا ہے اور…اور اس لئے نہیں چل سکتا ہے کیونکہ یہ بات حفظان صحت کے ساتھ ساتھ دین و ایمان سے جڑی ہو ئی ہے … اس لئے ایسے نہیں چلے گا کہ حکومت نے فروزن میٹ (منجمد گوشت) کے حوالے سے کچھ راہنما خطوط جاری کئے اور… اور بس۔یہیں پر اکتفا نہیں کیا جا سکتا ہے اور… اور اس لئے نہیں کیا جا سکتا ہے کہ ابھی کسی بات کا جواب … واضح جواب آیا ہے ا ور نہ کسی کو جواب دہ بنایا گیا ہے… جب تک تمام سوالات کا جواب نہیں ملتا اور… اور ان جوابات کی روشنی میں ملوث لوگوں کو جواب دہ نہیں بنایا جا سکتا ہے… اس وقت تک صاحب یہ معاملہ لٹکتا رہے گا…حل نہیں ہو گا ‘لوگ اسے حل طلب ہی سمجھیں گے اور … اور سو فیصد سمجھیں گے ۔ نہیں صاحب !ہم یہ نہیں کہہ رہے ہیں کہ حکومت اس معاملے پر مٹی ڈالنا چاہتی ہے… وہ اسے قالین کے نیچے چھپانا چاہتی ہے… نہیں بات یہ نہیں ہے… حکومت ایسا کر نہیں کر سکتی ہے… وہ پردہ پوشی کی متحمل نہیں ہو سکتی ہے… لیکن صاحب حکومت کو جوکرنا ہے… کم بخت وہ‘وہ کر نہیں رہی ہے… گلے سڑے گوشت کے بر آمد ہونے کے حوالے سے لوگوں میں اتنے سوالات ہیںکہ… کہ پوچھئے مت … حکومت بھی ان سب سوالات سے آگاہ ہے… لیکن وہ ان کے جوابات نہیں دے رہی ہے… یا دینا نہیں چاہتی ہے… شاید اس لئے نہیں دینا چاہتی ہے کیونکہ اس کیلئے شاید یہ اتنا زیادہ سنجیدہ مسئلہ اور معاملہ نہیں ہے… لیکن صاحب سن لیجئے… کان کھول کر سن لیجئے کہ… کہ یہ ایک سنجیدہ معاملہ ہے… اتنا سنجیدہ کہ … کہ اس کو گول نہیں کیا جا سکتا ہے… اس لئے اچھا…حکومت کیلئے اچھا یہی ہے کہ وہ اس معاملے پر سے پردہ ہٹا ئے اور تمام باتیں سامنے لائے… اور ہاں یہ بھی لوگوں کو بتائیے کہ… کہ اس بات کی کیا ضمانت ہے کہ مستقبل میں ایسا نہیں ہو گا… لوگوں کو گلا سڑا میٹ کھلا جائیگا اور نہ اس کے حلال ہو نے میں کوئی شک و شبہ ہو گا… یہ سب یقینی بنانے کیلئے حکومت نے کیا کیا ہے… یا کیا کرنے کا ارادہ رکھتی ہے… بس اتنی سی بات ہے جو لوگوں کو بتانی ہے… اس سے زیادہ کچھ نہیں … بالکل بھی نہیں ۔ ہے نا؟
فروزن میٹ:بس اتنا کہہ دیجئے
