اوڑی سیکٹر میں ایل او سی پر تصادم آرائی میں فوجی جوان جاں بحق

شمالی کشمیر کے ضلع بارہمولہ کے اوڑی سیکٹر میں لائن آف کنٹرول (ایل او سی) پر تصادم آرائی میں ایک فوجی جوان کی موت واقع ہوئی ہے۔
حکام نے بتایا کہ طرفین کے درمیان اوڑی سیکٹر کے چرندہ علاقے میں رات کے ساڑھے تین بجے شدید مگر مختصر گولیوں کا تبادلہ ہوا جس دوران ایک فوجی جوان زخمی ہوگیا جو بعد میں زخموں کی تاب نہ لاکر دم توڑ گیا۔
حکام نے کہا کہ طرفین کے درمیان گولیوں کا تبادلہ خراب موسمی صورتحال کے بیچ ہوا اور اگلے علاقوں میں وسیع پیمانے پر آپریشن جاری ہے۔تاہم یہ فوری طور معلوم نہیں ہوسکا کہ آیا یہ بارڈر ایکشن ٹیم (بی اے ٹی) حملہ تھا یا در اندازی کی کوشش کی تھی جس کو ناکام بنا دیا گیا۔
آئی جی پی کشمیر وی کے بردی نے سری نگر میں اس واقعے کے بارے پوچھے جانے والے ایک سوال کا جواب دیتے ہوئے کہا ”اس کے بارے میں ابھی پتہ لگا کیونکہ یہ ایل او سی سے متعلق معاملہ ہے ،اس کا جواب دینے میں ابھی تھوڑا وقت لگے گا، مزید جانکاری ملنے کے بعد اس کو واضح کیا جائے گا“۔
تاہم فوج کی طرف سے اس سلسلے میں فی الوقت کوئی بیان سامنے نہیں آیا ہے