جموں//
ناساز گار موسمی صورتحال کے پیش نظر حکام نے جموں و کشمیر کے راجوری، پونچھ اضلاع اور ضلع کٹھوعہ کے کچھ حصوں میں بدھ کے روز تمام اسکول بند رکھنے کا حکم جاری کیا ہے ۔یہ اقدام طلبا کے تحفظ کو یقینی بنانے کے لئے احتیاطی طور پر کیا گیا ہے ۔
حکام نے بتایا کہ خراب موسمی صورتحال کے پیش نظر ضلع میں۳۰جولائی۲۰۲۵یعنی بدھ کے روز تمام سرکاری و غیر سرکاری اسکول بند رہیں گے ۔انہوں نے بتایا کہ صورتحال کو باریک بینی دیکھا جا رہا ہے اور موسمی صورتحال کے پیش نظر مزید ایڈوائزریز جاری کی جا سکتی ہیں۔
ضلع کٹھوعہ کے بنی سب ڈویژن میں، سب ڈویژنل مجسٹریٹ (ایس ڈی ایم) نے مسلسل بارشوں اور پانی کی بڑھتی ہوئی سطح کے درمیان احتیاطی اقدام کے طور پر بدھ کو تمام تعلیمی اداروں کو بند رکھنے کی ہدایت دی ہے ۔انہوں نے کہا کہ یہ اقدام طلبا اور عملے کی حفاظت کو یقینی بنانے کے لئے کیا گیا ہے ۔
حکام مزید کارروائی کے لیے صورت حال کی قریب سے نگرانی کر رہے ہیں۔اسی طرح ضلع پونچھ میں بھی حکام نے بدھ کو احتیاطی طور تمام سرکاری و غیر سرکاری سکول بند رکھنے کا حکم دیا ہے ۔
حکام نے تینوں اضلاع کے لوگوں سے ہوشیار رہنے اور انتظامیہ کی طرف سے جاری ایڈوائزیز پر عمل کرنے کی تاکید کی ہے ۔
واضح رہے کہ محکمہ موسمیات کی پیش گوئی کے عین مطابق جموں و کشمیر میں بدھ کی صبح سے بارشیں ہو رہی ہیں۔
