(ویب ڈیسک)
سرینگر///
مرکزی وزیر داخلہ امیت شاہ نے پیر کو پارلیمنٹ میں آپریشن سندور پر جاری گرما گرم بحث کے دوران اپوزیشن کو سخت تنقید کا نشانہ بنایا، جب اپوزیشن نے وزیر خارجہ ایس جے شنکر کے اس بیان پر سوالات اٹھائے کہ امریکہ کا جنگ بندی میں کوئی کردار نہیں تھا۔
امیت شاہ نے کہا’’مجھے اعتراض ہے کہ اپوزیشن کو ایک بھارتی وزیر خارجہ پر یقین نہیں لیکن کسی اور ملک پر یقین ہے‘‘۔
شاہ نے طنزیہ انداز میں مزید کہا’’میں ان کی پارٹی میں غیر ملکیوں کی اہمیت کو سمجھتا ہوں، لیکن اس کا یہ مطلب نہیں کہ ان کی پارٹی کی ہر بات کو یہاں ایوان میں نافذ کیا جائے۔ یہی وجہ ہے کہ وہ آج وہاں (اپوزیشن بنچوں پر) بیٹھے ہیں، اور اگلے ۲۰سال تک وہیں بیٹھے رہیں گے‘‘۔
یہ سارا واقعہ اْس وقت پیش آیا جب وزیر خارجہ ایس جے شنکر پہلگام حملے اور آپریشن سندور کے حوالے سے بھارت کے مؤقف اور ردعمل پر خطاب کر رہے تھے۔
اپوزیشن کی مسلسل مداخلتوں کے دوران، امیت شاہ نے مداخلت کرتے ہوئے کہا’’کیا آپ اپنے ہی وزیر خارجہ پر یقین نہیں کریں گے؟‘‘
اپوزیشن لیڈروں کی طرف سے نعرے بازی اور شور شرابے کے دوران امیت شاہ کا یہ بیان سامنے آیا۔
اس سے قبل، ایس جے شنکر نے ایک بار پھر دہرایا کہ بھارت نے ڈونالڈ ٹرمپ کے ان دعوؤں کو واضح طور پر مسترد کیا ہے، جن میں انہوں نے کہا تھا کہ انہوں نے بھارت اور پاکستان کے درمیان آپریشن سندور کے دوران ثالثی کی یا کوئی سمجھوتہ کروانے میں مدد دی۔
جے شنکر نے کہا’’۲۲؍ اپریل (جب پہلگام حملہ ہوا) اور۱۷ جون (جب جنگ بندی کا اعلان ہوا) کے درمیان وزیر اعظم نریندر مودی اور ڈونالڈ ٹرمپ کے درمیان کوئی فون کال نہیں ہوئی۔ــ‘‘
