سرینگر//
سرینگر پولیس نے عالی مسجد عید گاہ میں منشیات فروش میر رومان ولد محمد ہاشم میرکی جائیداد جس کی مالیت ایک روڑ تین لاکھ روپیہ ہے کو ضبط کیا ہے ۔
یہ کارروائی پولیس اسٹیشن صفاکدل میں درج کیس ایف آئی آر نمبر۲۰۲۴/۱۳۶ کے تحت انجام دی گئی۔ پولیس کے مطابق یہ جائیداد منشیات کی غیر قانونی تجارت سے حاصل کی گئی آمدنی سے خریدی گئی تھی۔
پولیس بیان کے مطابق تحقیقات کے دوران یہ بات سامنے آئی ہے کہ ملزم میر رومان ایک طویل عرصے سے منشیات کے غیر قانونی دھندے میں ملوث ہے ، اور اس کے نشانے پر بالخصوص علاقے کے نوجوان تھے ۔ وہ مقامی سطح پر نشے کے زہر کو پھیلانے میں سرگرم تھا۔
پولیس حکام کا کہنا ہے کہ یہ کارروائی منشیات فروشوں اور ان کے پشت پناہوں کیلئے ایک سخت اور غیر مبہم پیغام ہے کہ معاشرے کو زہر آلود کرنے والوں کیلئے جموں و کشمیر میں کوئی جگہ نہیں۔ عوام سے اپیل کی گئی ہے کہ وہ ایسے عناصر کی نشاندہی کریں اور پولیس کے ساتھ تعاون کریں تاکہ سری نگر کو نشہ مکت اور محفوظ بنایا جا سکے ۔
پولیس کا کہنا ہے کہ منشیات فروشی سماج کے لئے ناسور بن چکی ہے لہذا اس کا قلع قمع کرنے کی خاطر عوام الناس کو قانون نافذ کرنے والے ادارے کے ساتھ اپنا دست تعاون فراہم کرنا چاہئے ۔
