راج ناتھ ایس سی او کے اجلاس میں دہشت گردی کے مکمل خاتمے پر زور دیں گے

نئی دہلی///
وزیر دفاع راج ناتھ سنگھ نے کہا ہے کہ وہ چین میں ہونے والے شنگھائی تعاون تنظیم (ایس سی او) کے اجلاس میں عالمی امن و سلامتی پر ہندوستان کا نقطہ نظر پیش کریں گے اور رکن ممالک سے مل کر دہشت گردی کو ختم کرنے پر زور دیں گے ۔
راجناتھ سنگھ نے بدھ کے روز سوشل میڈیا پلیٹ فارم پر پوسٹ میں کہا کہ وہ ایس سی او کے اجلاس میں شرکت کرنے جا رہے ہیں۔ انہوں نے کہا’’آج میں شنگھائی تعاون تنظیم (ایس سی او) کے وزرائے دفاع کی میٹنگ میں شرکت کے لیے چنگڈاؤ، چین کے لیے روانہ ہو رہا ہوں۔ مجھے مختلف ممالک وزرائے دفاع کے ساتھ مختلف امور پر تبادلہ خیال کرنے کا موقع ملے گا۔ میں عالمی امن اور سلامتی پر ہندوستان کا نقطہ نظر پیش کرنے اور دہشت گردی کے خاتمے کے لیے مشترکہ اور مسلسل کوششوں پر زور دینے کا منتظر ہوں‘‘۔
واضح رہے کہ شنگھائی تعاون تنظیم کا دو روزہ اجلاس آج سے چین کی صدارت میں شروع ہو رہا ہے ۔ ایس سی او اپنے رکن ممالک کی خودمختاری، ممالک کی علاقائی سالمیت، اندرونی معاملات میں عدم مداخلت، نیز باہمی احترام، مفاہمت اور مساوات کے اصولوں پر مبنی تمام رکن ممالک کی پالیسی پر عمل پیرا ہے ۔