کشمیر میں۲۳مئی تک گرمی کی شدت تیز تر ہونے کا امکان

سرینگر/۲۱مئی
محکمہ موسمیات کی پیش گوئی کے مطابق وادی کشمیر میں اگلے دو دنوں کے دوران گرمی کی شدت مزید بڑھ سکتی ہے اور اس دوران کہیں کہیں ہیٹ ویو کے بھی امکانات ہیں۔
محکمہ نے کہا کہ تاہم اس کے بعد وادی میں درجہ حرارت میں قدرے کمی واقع ہونے کا امکان ہے ۔ ان کا کہنا ہے کہ جموں صوبے میں درجہ حرارت میں مزید اضافہ درج ہونے کے ساتھ 26 مئی تک ہیٹ ویو جاری رہنے کی توقع ہے ۔
متعلقہ محکمے کے ایک ترجمان نے بتایا کہ وادی میں 23 مئی تک درجہ حرارت میں 1 سے 2 ڈگری سینٹی گریڈ کا اضافہ ہونے کا امکان ہے اور کہیں کہیں ہیٹ ویو بھی متوقع ہے ۔
انہوں نے کہا تاہم بعد میں درجہ حرارت میں 2 سے 3 ڈگری کی کمی ریکارڈ ہوسکتی ہے ۔ان کا کہنا ہے کہ جموں صوبے میں درجہ حرارت میں 2 سے 3 ڈگری کا اضافہ درج ہونے کے ساتھ 26 مئی تک ہیٹ ویو جاری رہنے کا امکان ہے ۔
ترجمان نے بتایا کہ جموں وکشمیر میں مجموعی طور پر 21 سے 26 مئی تک موسم خشک اور گرم رہنے کا امکان ہے ۔انہوں نے کہا کہ اس دوران بعد دوپہر کہیں کہیں گرج چمک کے ساتھ ہلکی بارشیں ہوسکتی ہیں اور کچھ مقامات پر تیز ہوائیں بھی چل سکتی ہیں۔
دریں اثنا محکمہ اطلاعات و تعلقات عامہ جموں وکشمیر نے یونین ٹریٹری میں بڑھتی ہوئی گرمی کے پیش نظر ایک ایڈوزئری جاری کرکے لوگوں کو احتیاطی تدابیر پر عمل کرنے کی اپیل کی ہے ۔
ایڈوائزری میں لوگوں کو ہیٹ ویو سے بچنے کےلئے کچھ نکات پر عمل کرنے اور کچھ سے باز رہنے کی ہدایت دی گئی ہے ۔لوگوں سے کہا گیا ہے کہ وہ شدید دھوپ کے وقت باہر جانے سے احتیاط کریں۔
ایڈوائزری میں لوگوں کو مقامی موسمی صورتحال کے بارے میں باخبر رہنے کے لئے ریڈیو، ٹی وی یا اخبار پر خبروں سننے کو کہا گیا ہے ۔
لوگوں کو احتیاطی تدابیر کے طور پر پیاس نہ لگنے پر بھی زیادہ سے زیادہ پانی پینے ، او آر ایس، گھر میں تیار کی جانی والی مشروبات جیسے ، لسی، لیمبو کا پانی وغیرہ استعمال کرنے کا مشورہ دیا گیا ہے ۔
ایڈوائزری میں لوگوں سے کہا گیا ہے کہ وہ کاٹن کے کپڑے سے بنے ہلکے اور ہلکے رنگ اور ڈھیلے لباس کو زیب تن کریں۔لوگوں سے کہا گیا ہے کہ جب وہ شدید گرمی میں باہر نکلیں تو سر کو کپڑے سے ڈھانپ لیں یا چھتری یا ہیٹ کا استعمال کریں۔
محکمے نے اپنی ایڈوائزری میں لوگوں سے کہا ہے کہ جانوروں کو بھی چھاﺅں میں باندھ کر رکھیں اور انہیں بھی زیادہ سے زیادہ پانی دیں۔لوگوں سے کہا گیا ہے کہ گاڑی پارک کرتے وقت بچوں کو گاڑیوں میں رکھنے سے اجتناب کریں۔