دہلی حکومت کی پالیسیوں سے تاجروں میں خوف کا ماحول : اے اے پی

نئی دہلی// عام آدمی پارٹی (اے اے پی) نے منگل کو دہلی حکومت پر بازاروں کی منتقلی کا الزام لگاتے ہوئے کہا کہ اس سے بڑے بڑے بازاروں کے تاجروں میں خوف کا ماحول پیدا ہو گیا ہے ۔
اے اے پی کے دہلی ریاستی کنوینر سوربھ بھردواج نے آج یہاں کہا کہ حال ہی میں دہلی کی وزیر اعلیٰ ریکھا گپتا نے کہا تھا کہ دہلی کے بڑے بڑے بازاروں میں بہت ہجوم ہو گیا ہے ، اسی لیے دہلی حکومت یہ حکمت عملی بنا رہی ہے ، کہ ان بازاروں کو یہاں سے کہیں اور منتقل کردیاجائے ۔ مسٹر بھاردواج نے کہا کہ جب سے دہلی کی وزیر اعلیٰ نے یہ اعلان کیا ہے ، دہلی کے بڑے بڑے بازاروں کے تاجروں میں خوف و ہراس پایا جاتا ہے کہ دہلی کی بھارتیہ جنتا پارٹی (بی جے پی) حکومت دہلی کے تاجروں کے خلاف کس طرح کی سازش رچنے والی ہے ۔
انہوں نے کہا کہ دہلی کے بڑے بازار دہلی کی میراث ہیں۔ ان بازاروں میں بیٹھے تاجر، ان کی دکانیں، ان کا کاروبار دادا، پردادا کے دور سے چلا آ رہا ہے ۔ یہ بازار ان تاجروں کے لیے صرف کاروبار کا ذریعہ نہیں ہے بلکہ ان بازاروں سے ان کے آباؤ اجداد کی یادیں بھی وابستہ ہیں۔ دہلی کا کوئی بھی تاجر دہلی کے بازاروں کو چھوڑ کر دوسری ریاست جانا نہیں چاہتا۔
انہوں نے کہا کہ ان بازاروں کی تزئین و آرائش کی جا سکتی ہے ، انتظامات کو بہتر کیا جا سکتا ہے ، لیکن دہلی حکومت بازاروں میں انتظامات کو بہتر کرنے کے بجائے ان بازاروں کو دہلی سے باہر منتقل کر کے دہلی اور دہلی کے تاجروں کو برباد کرنا چاہتی ہے ۔ انہوں نے کہا کہ وزیر اعلیٰ کو دہلی کے تاجروں اور دہلی کے بازاروں کے بارے میں کوئی علم نہیں ہے ۔ انہوں نے کہا کہ ہم دہلی کے تاجروں کے ساتھ کھڑے ہیں اور دہلی کی بی جے پی حکومت کے اس فیصلے کی سخت مخالفت کرتے ہیں۔