کولگام میں دو دہشت گرد معاون گرفتار، اسلحہ و گولہ بارود برآمد:پولیس

سرینگر//
جنوبی ضلع کولگام میں سیکورٹی فورسز نے دو دہشت گرد معاونین کو دھر دبوچ کر ان کے قبضے سے اسلحہ وگولہ بارود برآمد کرنے کا دعویٰ کیا ہے ۔
پولیس کے ایک ترجمان نے بتایا کہ متل ہامہ چوک ٹھوکر پورہ کیموہ میں ناکہ چیکنگ کے دوران دو مشتبہ افراد جن کی شناخت بلال احمد بٹ ولد عبدالسلام بٹ اور محمد اسماعیل بٹ ولد غلام محمد بٹ ساکنان ٹھوکر پورہ کیموہ کولگام کے بطور ہوئی کی گرفتاری عمل میں لائی گئی۔
انہوں نے کہا کہ جامہ تلاشی کے دوران گرفتار شدگان کے قبضے سے دو پستول‘۲۵پستول راؤنڈز اور دو پستول میگزین برآمد کیے گئے ۔
ترجمان کے مطابق ابتدائی تحقیقات کے دوران منکشف ہوا کہ دونوں دہشت گرد تنظیموں کے معاونین کے طور پر سرگرم تھے اور تخریبی سرگرمیوں میں ملوث ہونے کی کوشش کر رہے تھے ۔
واقعے کے حوالے سے پولیس اسٹیشن کیموہ میں ایف آئی آر نمبر۲۰۲۵/۲۹کے تحت کیس درج کرکے مزید تفتیش شروع کر دی گئی ہے ۔
پولیس حکام کا کہنا ہے کہ جنوبی کشمیر میں دہشت گردی کے نیٹ ورک کو ختم کرنے کے لیے مشترکہ آپریشنز میں مزید شدت لائی گئی ہے اور اس طرح کی کارروائیاں مستقبل میں بھی جاری رہیں گی۔