بانڈی پورہ جھڑپ میںدو پولیس اہلکار زخمی‘آپریشن جاری

سرینگر//
شمالی کشمیر کے ضلع بانڈی پورہ کے کلنار اجس علاقے میں جاری انکائونٹر کے دوران دو پولیس اہلکار زخمی ہوئے ہیں۔
حکام نے بتایا کہ ایک مصدقہ اطلاع پر کارروائی کرتے ہوئے سیکورٹی فورسز نے بانڈی پورہ کے اجس کے جنگلاتی علاقے میں جمعہ کی صبح وسیع پیمانے پر تلاشی آپریشن شروع کر دیا۔انہوں نے کہا کہ جوں ہی تلاشی آپریشن کی ایک ٹیم مشتبہ مقام کے نزدیک پہنچی تو وہاں چھپے ملی ٹنٹوں نے ان پر فائرنگ شروع کر دی جس کے نتیجے میں طرفین کے درمیان تصادم چھڑ گیا۔
حکام کا کہنا تھا’’ابتدائی فائرنگ کے تبادلے کے نتیجے میں۲پولیس اہلکار زخمی ہوگئے‘‘۔تاہم پولیس نے اس کی اب تک تصدیق نہیں کی ہے ۔
قبل ازیں فوج کی چنار کور نے’ایکس‘پر ایک پوسٹ کے ذریعے جانکاری فراہم کرتے ہوئے کہا کہ دہشت گردوں کے چھپنے کے متعلق مصدقہ اطلاع موصول ہونے پر فوج اور پولیس کی ایک ٹیم نے۲۵؍اپریل یعنی جمعہ کی صبح بانڈی پورہ کے کلنار اجس علاقے میں مشترکہ تلاشی آپریشن شروع کر دیا۔
فوج نے کہا کہ اس دوران طرفین کے درمیان آمنا سامنا ہوا اور تصادم چھڑ گیا۔پوسٹ میں مزید کہا گیا کہ علاقے میں آپریشن جاری ہے ۔