نیوزی لینڈ نے تیسرے اور آخری ون ڈے میچ میں پاکستان کو 43 رنز سے ہرا کر سیریز میں کلین سویپ کر لیا

ماؤنٹ مونگانوئی//نیوزی لینڈ نے تیسرے اور آخری ون ڈے میچ میں پاکستان کو 43 رنز سے ہرا کر سیریز میں کلین سویپ مکمل کر لیا۔ بارش کے باعث تاخیر سے شروع ہونے والے میچ کو 42 اوورز تک محدود کر دیا گیا تھا۔ نیوزی لینڈ نے پہلے بیٹنگ کرتے ہوئے 8 وکٹوں کے نقصان پر 264 رنز بنائے۔ ریس ماریو اور مائیکل بریسویل نے نصف سنچریاں اسکور کیں۔
عاکف جاوید نے 4 کھلاڑیوں کو آؤٹ کیا۔ پاکستان ٹیم ہدف کے تعاقب میں 40 اوورز میں 221 رنز بنا کر آؤٹ ہو گئی۔ بابر اعظم 50 رنز بنا کر نمایاں رہے۔ بین سیئرز نے 5 وکٹیں حاصل کر کے ٹیم کی فتح میں اہم ادا کیا۔ انہیں سیریز کا بہترین کھلاڑی قرار دیا گیا جبکہ مائیکل بریسویل پلیئر آف دی میچ قرار پائے۔
تفصیلات کے مطابق ماؤنٹ مونگانوئی میں بارش کے باعث میچ تاخیر سے شروع ہوا۔
42 اوورز کے میچ میں پاکستان نے ٹاس جیت کر فیلڈنگ کا فیصلہ کیا جو غلط ثابت ہوا۔ نیوزی لینڈ نے پہلے بیٹنگ کرتے ہوئے مقررہ 42 اوورز میں 8 وکٹوں کے نقصان پر 264 رنز بنائے۔ کپتان مائیکل بریسویل نے 59 اور ریس ماریو نے 58 رنز کی عمدہ اننگز کھیلی۔ دیگر بیٹرز میں ڈیرل مچل 43، ہینری نکولس 31 اور ٹم سیفرٹ 26 رنز بنا کر نمایاں رہے۔ عاکف جاوید نے چار، نسیم شاہ نے دو جبکہ فہیم اشرف اور سفیان مقیم نے ایک، ایک وکٹ حاصل کی۔
پاکستان ٹیم مطلوبہ ہدف حاصل کرنے میں ناکام رہی اور پوری ٹیم 40 اوورز میں 221 رنز بنا کر آؤٹ ہو گئی۔ اوپنر امام الحق اننگز کے آغاز میں ہی بال لگنے سے انجری کا شکار ہو گئے۔ انہیں رن لینے کے دوران فیلڈر کی تھرو جبڑے پر لگی۔ وہ کنکشن ٹیسٹ پاس نہ کر سکے۔ عبد اللہ شفیق اور بابر اعظم نے پہلی وکٹ میں 73 رنز کا اچھا آغاز فراہم کیا لیکن پھر کوئی بھی بڑی شراکت قائم نہ ہو سکی۔
عبداللہ شفیق 33 رنز بنا کر آؤٹ ہوئے۔ کنکشن رولز کے تحت امام الحق کی جگہ عثمان خان بیٹنگ کے لیے آئے اور 12 رنز بنا کر پویلین لوٹ گئے۔ بابر اعظم 50 رنز بنا کر ٹاپ اسکورر رہے۔ سلمان آغا 11، کپتان محمد رضوان 37، فہیم اشرف 3، نسیم شاہ 17، محمد وسیم صفر، طیب طاہر 33 اور سفیان مقیم 2 رنز بنا کر آؤٹ ہوئے۔ بین سیئرز نے شاندار باؤلنگ کا مظاہرہ کیا اور مسلسل دوسری بار اننگز میں 5 وکٹیں حاصل کیں۔
جیکب ڈفی نے دو جبکہ مائیکل بریسویل، محمد عباس اور ڈیرل مچل نے ایک، ایک وکٹ حاصل کی۔ واضح رہے کہ دوسری اننگز کے 39 ویں اوور میں جب جیکب ڈفی، طیب طاہر کو گیند کر رہے تھے کہ لائٹس بند ہو گئیں جس کی وجہ سے میچ کو چند منٹوں کے لیے روک دیا گیا۔