وفاقی وزیر داخلہ کا ۶ ؍اپریل سے جموں اور سرینگر کا دورہ

سرینگر//
مرکزی وزیر داخلہ امیت شاہ ۶؍اپریل سے ۸ اپریل تک جموں کشمیر کا تین روزہ دورہ کریں گے۔
تین روزہ دورے کے دوران شاہ بی جے پی اراکین اسمبلی سے ملاقات کریں گے، سیکورٹی جائزہ اجلاسوں کی صدارت کریں گے، جموں میں سالانہ امرناتھ یاترا کی تیاریوں کا جائزہ لیں گے اور سرینگر جائیں گے، جہاں وہ وزیر اعلیٰ‘ عمر عبداللہ سے ملاقات کریں گے۔
شاہ۶؍اپریل کو جموں پہنچیں گے اور شام کو بی جے پی ممبران اسمبلی اور پارٹی کے سینئر رہنماؤں کے ساتھ میٹنگ کریں گے۔ مرکزی وزیر مملکت ڈاکٹر جتیندر سنگھ بھی اس موقع پر موجود ہوں گے۔
اجلاس میں موجودہ بجٹ سیشن میں بی جے پی اراکین اسمبلی کی کارکردگی پر توجہ مرکوز کی جائے گی ، جو ۷ اپریل کو دوبارہ شروع ہوگا اور۹؍ اپریل کو ختم ہوگا۔
ذرائع نے بتایا کہ جموں کشمیر میں سیاسی پیش رفت پر بھی تبادلہ خیال کیا جائے گا۔
وزیر داخلہ ایک اعلی سطحی یونیفائیڈ ہیڈکوارٹر سیکورٹی جائزہ اجلاس کی صدارت کریں گے ، جس میں جموں و کشمیر کے ایل جی منوج سنہا ، فوج ، نیم فوجی دستوں ، انٹیلی جنس اور سول انتظامیہ کے اعلی عہدیدار شامل ہوں گے۔
ذرائع نے بتایا کہ اجلاس میں جموں کے بالائی علاقوں خاص طور پر کٹھوعہ اور ادھم پور میں دراندازی کی کوششوں اور دہشت گردانہ نقل و حرکت کا جائزہ لیا جائے گا۔
جموں میں شاہ بین الاقوامی سرحد کا دورہ کریں گے اور ڈیوٹی کے دوران اپنی جان گنوانے والے پولیس اہلکاروں کے اہل خانہ سے ملاقات کریں گے۔
جموں کشمیر کے سیاسی اور سیکورٹی منظر نامے سے متعلق کسی بھی بڑے اعلان کیلئے ان کے دورے پر گہری نظر رکھی جارہی ہے۔
ذرائع نے بتایا کہ ایک علیحدہ میٹنگ میں۳ جولائی سے۹؍ اگست تک ہونے والی امرناتھ یاترا کے لئے سیکورٹی اور لاجسٹک انتظامات پر توجہ مرکوز کی جائے گی۔
وزیر داخلہ ورچوئل افتتاح اور سنگ بنیاد کی تقریب کے ذریعے مرکز کے زیر انتظام علاقے کے عوام کے نام کئی کروڑ روپے کے پروجیکٹ وقف کریں گے۔ ذرائع نے بتایا کہ وزیر اعلی عمر عبداللہ کے افتتاحی تقریب میں شامل ہونے کی توقع ہے ، انہوں نے مزید کہا کہ وزیر اعلی کے شاہ سے بھی ملاقات کرنے کا امکان ہے۔ شاہ ۸؍ اپریل کو نئی دہلی واپس روانہ ہوں گے۔