وادی میں اگلے۴۸گھنٹوں کے دوران برف و باراں کا امکان

سرینگر//
محکمہ موسمیات کی پیش گوئی کے مطابق وادی کشمیر میں اگلے۴۸گھنٹوں کے دوران برف و باراں کا امکان ہے جس کا زیادہ تر اثر شمالی اور وسطی کشمیر میں رہ سکتا ہے ۔
محکمے نے اپنی ایڈوائزری میں کسانوں سے کہا ہے کہ وہ۲۶؍اور۲۷مارچ کو اپنے کھیت کھلیانوں اور باغوں میں کام معطل رکھیں۔
متعلقہ محکمے کے ایک ترجمان نے بتایا کہ وادی میں۲۵مارچ کو پہاڑی علاقوں میں کہیں کہیں ہلکی برف باری یا بارشوں کا امکان ہے ۔
ترجمان نے کہا کہ۲۶؍اور۲۷مارچ کو برف و باراں کا ایک اورمرحلہ متوقع ہے جو ۲۶مارچ کی دوپہر سے شام تک اور۲۷مارچ کی دوپہر سے شام تک جاری رہ سکتا ہے ۔
ان کا کہنا ہے کہ اس دوران خاص طور پر شمالی اور وسطی کشمیر کے پہاڑی علاقوں میں ہلکی سے درمیانی درجے کی برف باری یا بارشوں کا امکان ہے ۔
ترجمان نے بتایا کہ اس کے بعد موسم میں بہتری واقع ہوسکتی ہے اور پھر۲۸مارچ سے۳؍اپریل تک موسم عام طور پر خشک رہنے کی توقع ہے ۔
محکمے نے اپنی ایڈوائزری میں مسافروں، سیاحوں اور ٹرانسپورٹروں سے کہا ہے کہ وہ ٹریفک ایڈوائزریز پر عمل کریں۔
ایڈوائزری میں کسانوں سے کہا گیا ہے کہ وہ ۲۶؍اور۲۷مارچ کو اپنے کھیت کھلیانوں اور باغوں میں آپریشنز معطل رکھیں۔
دریں اثنا وادی کے میدانی علاقوں میں منگل کو موسم خشک مگر ابر آلود رہا اور اس بیچ کسانوں کو اپنے کھیت کھلیانوں اور باغوں میں کام کرتے ہوئے دیکھا گیا۔